Kryeministri Edi Rama e quan thuajse realitet të kryer hapjen e listave të hapura.
Në përfundim të mbledhjes së Këshillit Politik, Rama u shpreh se kjo çështje nuk është më variant, por angazhim përballë qytetarëve për të zgjedhur.
“Diskutimi ishte pozitiv. Hapja e listave për ne nuk është një variant, por angazhim karshi njerëzve dhe ne kërkojmë t’i përfshijmë qytetarët në procesin e atij që nesër do jetë grupi ynë parlamentar”, tha kreu i Qeverisë.
Ai pranoi ndër të tjera se ka një qasje imponuese nga ana e opozitës.
“Diskutimi ishte interesant, ne nuk është se thamë ndonjë gjë të re, gjëra që ju i dini. Kemi qëndrim shumë të qartë dhe ka një realitet politik i cili imponon një qasje, që për ne është e diktuar si forca më e madhe, por ne kemi detyrimin të krijojmë një proces dhe të arrijmë në një rezultat ku, nëse të gjitha palët s’janë 100 përqind s’janë dakord me të gjitha, secila të ketë pjesën e vet.
Në këtë aspekt mendoj se është me rëndësi të diskutojmë, të vijojmë të diskutojmë”, vijoi Rama.
Një përgjigje rezervoi edhe për mungesën e Lulzim Bashës në tryezë.
“Shoh se në këtë rast është e rëndësishme përmbajtja e çështjes, sesa ajo e delegacioneve. Është zgjedhja e opozits të vijë e përfaqësuar me këdo që dëshiron”.
Diskutimet e ditës së sotme zgjatën pesë orë.
/a.r
