Kryeminsitri Edi Rama ka mbledhur disa të rinjt pak metra larg çadrës së lirisë ku po proteston opozita me të cilët ka ndarë disa këshilla.
Ai u ndal tek mundësitë që ofron vendi ynë për punësimin e të rinjve.
Përmes një postimi në rrjetin social Facebook, Rama ka shpërnarë momentin e këtij takimi ku shkruan: “Me të reja e të rinj që punojnë, bëjnë biznes, aktivizohen si qytetarë”
Shefi i qeverisë në këtë takim tha se ka vende pune por duhen parë.
“Sot në Shqipëri ka shumë vajza e djem që nuk ankohen, nuk qahen, nuk mallkojnë, por që përpiqen. Ka shumë të rinj në këtë vend që punojnë. Mundësinë për të jetuar me pasionin e punës, çdo njeri e ka përpara syve, por jo të gjithë e shohin. Shqipëria që kemi është shumë më e mirë se ajo që kishim.
Sot ka shumë më tepër gjera sesa Shqipëria që duan të na tregojnë përmes pasqyrave të gënjeshtërta të katundit mediatik të Tiranës. Në Shqipërinë që kemi sot, ka vajza dhe djem që ëndërrojnë të bëhen milionerë. Kam takuar disa prej tyre dje”, tha Rama.
Kryeministri Rama u ndal tek puna e bërë nga qeveria që ai drejton në këto 3 vite e gjysmë. Sakaq, ai ka shprehur angazhimin për të vijuar me projektet dhe reformat që mundësojnë zhvillimin e vendit.
“Në këto 3 vite e gjysmë ne nuk kemi bërë asnjë mrekulli, por kemi provuar se ky vend është si gjithë të tjerët, se ky vend mund të bëhet shtet, se në këtë vend mund të ketë punë për të gjithë ata që duan të punojnë. Nëse shohim sot këdo në sy, askujt nuk mund t’i themi ‘lum si ti, se ja votove për ne e të gjitha problemet e tua u zgjidhën’.
Por mund t’u themi ‘ktheheni kokën prapa, tek Shqipëria që kishim, dhe pastaj bëni dallimin me ketë që kemi sot’. Edhe pse ajo që kemi bërë nuk mjafton, tregon se ne kemi mundësinë ta bëjmë Shqipërinë që duam”, tha Rama. /b.d
