Në OSBE nuk shkon gjithçka mirë. Kështu u shpreh Edi Rama nën cilësinë e kryetarit të institucionit në fjalë gjatë Konferencës Vjetore të Rishikimit të Sigurisë 2020.
Rama tha se bashkëpunimi mes vendeve anëtare po dështon për shkak të mungesës së besimit.
“Ky besim mungon për shkak të çarave në dialogun tonë dhe për shkak të shpërfilljes të përsëritur të parimeve të anagzhimeve tona. Kjo po prek themelet e organizatës tonë” – tha Edi Rama.
Ai shtoi se mbetet i shqetësuar për shkak të mungesës së përmirësimit të situatës në Ukrainë. Rama tha se uron të shohë përparime sa i përket konfliktit në fjalë.
“Një armëpushim i plotë është thelbësor. Na duhet të nxisim një mjedis paqësor” – tha kryetari i OSBE, Rama.
“Krimi i organizuar është një tjetër fushë ku Shqipëria kërkon të vërë theksin. Duhet të përballemi me të gjithë ciklin, nga parandalimi, tek hetimi dhe tek vendosja para drejtësisë. Gjithashtu është me interes që të shtojmë sigurinë kibernetike. Si dhe kontrolli mbi armët ka rëndësinë e saj. Kjo kërkon besim. Duket sikur gjërat po dështojnë para syve tanë. Por OSBE ka një bilanc pozitiv sa i përket sigurisë” – tha Rama në konferencën online.
/JavaNews/ a.r
