Kryeministri Edi Rama në aktivitetin e sotëm për programin dy vjeçar qeverisës, iu përgjigj pyetjes së një qytetari në Facebook, i cili tha se kryedemokrati Lulzim Basha me të shoqen udhëtojnë me avion me bussines klas, ndërsa atij i përmendën vilën në Surrel.
“Fatkeqësisht jetojmë në një kohë ku secili thotë menjëherë atë që i vjen dhe koha për të menduar është shkurtuar në minimum! Nuk mund të presësh që të dyshojnë qytetarët kur vetë mediat nuk dyshojnë për atë që kanë para syve në momentin e parë. Jo vetëm atë që kanë para syve por edhe atë që ju vjen ndërmend, e lëshojnë në ajër. Vila ime në surrel? Cila vilë në Surrel? Sa janë vila si ajo e Surrelit që janë ndërtuar në Shqipëri? Këtu kam parasysh vila me 2-3 kate”, tha Rama.
Ai shtoi se vila e tij në Surrel ka një formë që e ka të ndryshme “siç jam unë i ndryshëm nga të tjerët”, teksa thase në raport e tërësinë e banesave individuale të shqiptarëve, është një banesë individuale e një familje shqiptare dhe asgjë më shumë dhe kaq.
“Për të gjithë ata që kanë hedhur pafund baltë lidhur me këtë, mund të them vetëm kaq që shtëpia ime është e deklaruar në çdo detaj dhe e me çdo faturë”, deklaroi Rama.
Kreu i qeverisë vijoi më tej duke thënë se do të ishte shumë i lumtur nëse të gjithë bashkëjetuesit në hapësirën publike të zhurmës politike do të binin dakord të bënin një sqarim “shtëpi më shtëpi për të ardhurat dhe sa korrespondojnë të ardhurat me produktin”.
Lidhur me fluturimin e Bashës me të shoqen me avion të klasit të parë, Rama tha se “Sa i takon biznes klasit, nuk udhëton në biznes klas qeveria jonë, me përjashtim kur 198 cm e mia duhet të udhëtojnë përtej oqeanit, për shkak të problemeve të mia me shtyllën kurrizore”.
g.kosovari
