Kryeministri Edi Rama në një intervistë për mediat greke ka deklaruar se së shpejti do të takohet me homologun Tsipras për të zgjidhur përfundimisht çështjet e vjetra me Greqinë.
Në një intervistë të shkurtër për drejtorin e Përgjithshëm të agjencisë shtetërore greke “ANA-MPA”, Mihail Psilou, shefi i qeverisë ka folur për marrëdhëniet Shqipëri-Greqi, për bisedimet dypaleshe, si dhe për incidentin në Bularat.
Rama i ka quajtur marrëniet shqiptaro-greke si historike.
“Marrëdhëniet shqiptaro-greke janë historike dhe tradicionale fqinjësie, e si ndodh gjithnjë me fqinjët, nuk ecin gjërat gjithmonë në mënyrë të përkryer. Kjo dihet nga vetë eksperienca me çdo fqinj, si në një fshat, në një qytet apo akoma dhe mes vendeve, janë gjithmonë njësoj” theksoi në intervistë kryeministri Rama duke shtuar me humor “këtë e koncepton më mirë në një ndeshje futbolli mes fqinjëve, është si luftë”, deklaroi Rama
Referuar vrasjes së minoritarit Kaficas që u shoqërua me deklarata të forta nga dy vendet dhe shpalljen ‘non grata’ të 53 grekëve, Rama u shpreh se mes fqinjëve ka edhe incidente, por marrëdhëniet mes dy vendeve janë të mirë dhe se nuk ka urrejtje.
Rama ka theksuar se “janë shumë të gatshëm të përmirësojmë këtë marrëdhënie në bazë përditshme, vazhdimisht dhe këtë e vërtetojmë me vepra. Ndodhin disa herë edhe incidente, duhet t’i përballojmë sepse ndodhin, por tashmë marrëdhëniet janë pozitive dhe çfarë është më e rëndësishme, nuk ka urrejtje mes dy popujve”
“Grekët e duan Shqipërinë dhe Shqiptarët e duan Greqinë, pjesa tjetër është thjesht politikë” deklaroi Edi Rama.
Kryeministri njoftoi se se shpejti do të takohet me Tsipras, por pa dhënë një datë dhe vendin e takimit.
“Nuk e di se ku, në Tiranë apo në Athinë, por planifikohet të takohemi së shpejti. Jemi në mes një faze dialogu të shpeshtë dhe diskutimi të shumë çështjeve, që shtrihen në mjaft vite dhe që nuk janë prekur kurrë. Me vullnet e guxim të plotë, si dhe vendosmëri për t’u zgjidhur. “Besoj se jemi shumë afër zgjidhjes të gjithë kësaj problematike të vjetër dhe kjo do të ishte një arritje e madhe”, ka përfunduar kryeministri Rama, sipas AMNA.
Javanews/a.çupaj
