Disa orë pas pezullimit nga detyra të ish-drejtorit të Përgjithshëm të policisë Haki Çako, kryeministri Edi Rama vizitoi panairin e uniformave blu ku dha edhe një deklaratë për mediat. Edhe pse nuk përmendi çështjen e përgjimeve dhe pezullimin e Çakos, për të cilin shpërndau më herët një deklaratë, Rama kritikoi ata që sulmojnë policinë. Ai tha se policia sulmohet për mllefe dhe për inat nga ata që nuk duan reformin dhe transformimin.
“Besoj ky ëhstë një moment i rëndësishëm për të reflektuar mbi sa shumë gjëra policia ka marrë një përmasë dinjiteti, profesionalizmi, qytetarie dhe shërbëtorie të komunitetit, çka nuk do të thotë se gjithçka kemi bërë është e mjaftueshme. Por pikërisht pse kaq shumë janë bërë duhet të vazhdojmë të bëjmë akoma më shumë gjëra që mbeten për t’u bërë. Kur bie kaq shumë në sy ngjall edhë shumë mllefe. Sa më shumë policia do të sulmohet nga fronti i së keqqes. Aq më shumë do çojmë më tej reformat dhe transforimin”, tha Rama.
Më tej ai përshëndeti edhe organizimin e panairit të policisë dhe premtoi uniformat e reja që sipas ramës do të ngjasojnë për nga estetika me policitë evropiane.
“Organizimi i kësaj hapësire ku njerëzit mund të shohin nga afër policinë dhe të gjithë instrumentat e saj, të marrin një informacion vizual të përmbledhur mbi mjetet e policisë. Së shpejti edhe bëjmë një prezantim madhështor të gjithë uniformave të reja që do ta përfshijnë edhe Policinë tonë të Shtetit në standartet estetike të policive evropiane por do t’i japin asaj të gjithë atë paketë uniformash të domosdoshme për një polici digjitoze”, tha Rama.