Lulzim Basha, kreu i Demokratëve Euroatlantikë e ka quajtur lajm të mirë çeljen e negociatave me Bashkimin Europian për grup-kapitullin e parë. Por ai akuzon kreun e qeverisë Edi Rama se të falenderosh Putinin për këtë hap është tallje për Evropën dhe shqiptarët.
Edi Rama më herët ditën e sotme, teksa ndodhej në Luksemburg tha se ky është një moment i veçantë për Shqipërinë, dhe ndodhi edhe falë Putinit.
Rama: Ky moment është i veçantë dhe më duhet të them dhe falë edhe Vladimir Putinit, i cili për shkak të luftës mizore të agresionit, zgjoi nga gjumi edhe më skeptikun dhe i bëri të shohin realitetin që Ballkani Perëndimor është i nevojshëm për një BE më të fortë, po aq sa BE, konstelacioni i BE është i nevojshëm për Ballkanin Perëndimor.
Basha në reagimin e tij shkruan se prej 2012 kur u sugjerua hapja e negociatave, u deshën 12 vjet për ta zhbllokuar këtë proces. Tani, thotë ai, do të jetë në dorë të shqiptarëve, nëse duan të presin edhe dhejtëra vite deri në përmbylljen e këtij procesi apo do të zgjedhiun një qeveri, që sipas tij, mendon për popullin.
Basha: Hapja e negociatave pa asnjë diskutim është një lajm i mirë për Shqipërinë. Por, të falenderosh Putinin për këtë hap është tallje për Europën dhe shqiptarët. Negociatat u vonuan fillimisht për shkak të destruktivitetit të Edi Ramës në opozitë, e më pas se ai bëri gjithçka për të mbrojtur bashkëpunëtorët e korruptuar dhe inkriminuar.
Në një kohë kur Shqipëria është ndër vendet më të korruptuara të Europës, ku si asnjë kryeministër tjetër në Europë Edi Rama veshi kriminelët me pushtet, ministra e zëvendës kryeministri i tij janë dënuar dhe nën hetim për korrupsion, lidhje me krimin e pastrim parash, negociatat do të shërbejnë edhe si mjet shtesë monitorimi për Shqipërinë dhe shpresojmë edhe si garanci për t’i ndalur planet e qeverisë Rama për të penguar punën e SPAK, për të çuar para drejtësisë zyrtarët e përfshirë në krim dhe korrupsion.
Që prej 2012-ës, kur u sugjerua hapja e negociatave, u deshën 12 vjet për ta zhbllokuar këtë proces. Tashmë do të jetë në dorë të shqiptarëve nëse do të presin edhe dhjetra vite deri në përmbylljen e këtij procesi, me një kryeministër që hallin e vetëm ka pushtetin e tij, apo do të zgjedhin të ecin më shpejt, duke zgjedhur një qeveri që do të mendojë dhe punojë për ta. Shqipëria meriton më shumë.
/a.r
