Përplasjet me policinë dhe incidentet me deputetët nuk ishin të vetmet që tërhoqën vëmendjen në protestën para Kuvendit. Protesta prodhoi edhe teorinë e radhës, ku Vjena, Vlora, Turqia, Serbia, Franca dhe Austria u bashkuan në një fjali të vetme.
Kjo ndodhi kur një qytetar mori mikrofonin dhe ndërtoi një teori konspirative, duke e lidhur situatën në vend me një sulm terrorist të ndodhur në Vjenë në vitin 2020.
Sipas pretendimeve të tij, pas kësaj historie qëndrojnë disa shtete, ndërsa ai arriti në përfundimin se kryeministri Edi Rama është “i shantazhuar”.
“Tani që të dini historinë. Në nëntor të 2020-ës në Vjenë ka ndodhur një akt terrorist. Ka qenë një akt i parapërgatitur nga francezët, serbët dhe vetë austriakët, ku një shqiptar ka vrarë një shqiptar tjetër dhe disa shqiptarë të tjerë dhe është kapur nga një police austriake, po me origjinë shqiptare.Është e vërtetë kjo. Dhe e kanë zbuluar turqit këtë fakt që ka qenë prit. Në temë, temë. Edi Rama po ju jep tokat vlonjatëve sepse është i shantazhuar. Kaq i thjeshtë fare”, tha ai në një prononcim për mediat.
