Në mbledhjen e sotme të Këshillit të Ministrave, përveç miratimit të shkarkimit të Erion Veliajt si kryetar i Bashkisë së Tiranës, janë marrë edhe vendime të tjera.
Në kuadër të ndryshimeve të fundit në strukturën qeveritare, janë bërë emërime të reja në disa poste të larta.
Mes tyre, Silva Caka është emëruar zv.ministre e Punëve të Brendshme, duke u larguar zyrtarisht nga Partia e Ilir Metës. Caka gjatë karrierës së saj politike ka shërbyer si deputete e Kuvendit të Shqipërisë në vitet 2013-2019, pasi fitoi mandatin në qarkun e Beratit nën siglën e LSI-së. Ajo zëvendëson kështu ish-zëvendësministrin Andi Mahila, të shkarkuar ditë më parë nga ministrja albana Koçiu, pasi u fotografua duke pirë cigare në ambientet e brendshme të një lokali.
Ndërkohë, Edona Bilali merr detyrën e zv.ministres së Infrastrukturës dhe Energjisë, ku do të angazhohet për zhvillimin dhe menaxhimin e projekteve strategjike në sektorin e energjisë dhe infrastrukturës. Një rikthim në skenën qeveritare bën edhe Eugena Tomini, e cila është emëruar si zv.ministre e Shëndetësisë, detyrë të cilën e ka mbajtur edhe më parë.
Këtë të enjte, 25 shtator, Këshilli i Ministrave ka shkarkuar zyrtarisht nga detyra kryebashkiakun e Tiranës, Erion Veliaj.
Ky vendim i mbledhjes së parë të qeverisë “Rama 4”, që nisi në orën 12:00, hap rrugën për zgjedhjet e parakohshme në kryeqytet.
