Në reagimin që ngjan si përgjigje ndaj shqetësimeve të Ramës, SPAK nënvizon se kuadri ligjor garanton që hetimet për veprat penale në kuadër të zgjedhjeve të kryhen pa ndërhyrje politike apo presione të jashtme dhe kërkon respektimin e pavarësisë së këtij institucioni.

“Hetimi i veprave penale në kuadër të zgjedhjeve shpesh mund të jetë subjekt i presioneve politike dhe ndërhyrjeve të ndryshme të jashtëligjshme, të cilat mund të synojnë devijimin ose vonesën e hetimeve. Këto ndërhyrje mund të ndikojnë tek dëshmitarët, tek të hetuarit apo edhe tek institucionet përgjegjëse për hetimin dhe gjykimin e rasteve. Garantimi i pavarësisë së SPAK nga të gjithë aktorët dhe sigurimi i mbështetjes institucionale do të jenë thelbësorë për të përballuar këtë sfidë”.

Përdorimi i parasë kesh është një sfidë thotë SPAK, por deklaron se shpenzimi i fondeve të partive politike do të jetë kryefjalë e punës së prokurorëve, ku në qendër të hetimit do të kenë shit-blerjen e votave.

“Përdorimi i parasë cash, i cili është i vështirë për t’u ndjekur, si dhe mungesa e bashkëpunimit nga individë apo subjekte private të përfshira, përbëjnë sfida të mëdha për organet hetimore. Në këtë kuadër, do të jetë e domosdoshme rritja e bashkëpunimit me institucionet financiare, forcimi i mekanizmave të raportimit të transaksioneve të dyshimta dhe përmirësimi i bashkëpunimit ndërkombëtar për ndjekjen e fondeve që vijnë nga jashtë Shqipërisë”.

Sipas kësaj strukture problem nuk janë vetëm kandidatët, por edhe krimi i organizuar që përfshihet në zgjedhje, ndaj një vëmendje e veçantë do t’i kushtohet kësaj problematike.

“Grupet kriminale, për interesat e tyre të paligjshme shpesh ndërhyjnë në procesin zgjedhor përmes kërcënimeve, manipulimeve financiare, korrupsionit të zyrtarëve zgjedhorë, etj. Përballja me këtë fenomen kërkon një reagim të koordinuar mes SPAK, Policisë së Shtetit, agjencive të tjera ligjzbatuese dhe partnerëve ndërkombëtarë për të identifikuar dhe neutralizuar çdo përpjekje të grupeve kriminale për të ndikuar në zgjedhje”.

SPAK, teksa e quan një sfidë të re votimin nga jashtë, premton se do të shtrijë hetimet edhe për shkelje që partitë mund të bëjnë gjatë fushatës në diasporë. Sipas strategjisë së publikuar, struktura e posaçme bën me dije se do të krijojë një platformë të dedikuar ku qytetarët mund të bëjnë denoncimet e tyre.