Për kryeministrin Edi Rama dy janë rrugët e Shqipërisë, vazhdimi i operacionit për të pastruar vendin dhe sektorët kryesorë ose rikthimi prapa, në një epokë të kriminalitetit, korrupsionit dhe ku rregullin e bëjnë të fortët e lidhur me politikën. Kryeministri shtoi se vitin e ardhshëm, Shqipëria hyn në 2016, duke mos i patur borxhe askujt. Në aktivitetin e titulluar pikërisht “të pastrojmë më tej Shqipërinë” Kryeministri tha se qeverisja është në mes të mandatit dhe ndodhet në një moment ku i gjithë operacioni i saj duhet medoemos të vijojë dhe të shkojë përpara, në mënyrë që “metastazat e kancerit”, në trupin e Shqipërisë të mos jenë më.
“Besoj se kemi pastruar sa nuk është pastruar në 20 e kusur vite…Duhet të vazhdojmë të pastrojmë dhe për të pastruar më tej e kemi të domosdoshme që sot të jemi më shumë se dje të vendosur për ta çuar deri në fund këtë punë. Kjo nuk është një punë që ne e kemi zgjedhur sepse kjo punë na jep kënaqësi të madhe, duke parë kaq shumë, sesa plagë duhen pastruar. Por kjo është e vetmja punë që po çon para vendin, nuk ka rrugë tjetër. Rruga tjetër do të ishte të ktheheshim aty ku ishim, të lejojmë korrupsionin dhe krimin, të lejojmë përhapjen e metastazave të kancerit që kishin zënë cdo sektor të vendit.”- u shpreh Rama
Kryeministri theksoi se mazhoranca qeverisëse nuk ka shkop magjik për të përmbysur situatën. Rama deklaroi se vijimi i operacionit do të garandojë edhe situatën e gjeneratave që do vijnë më pas.
“Operacioni është konceptuar me një plan dhe me një kalendar. Në të parët por besoj se dhe asnjë njeri i aryeshëm nuk mund të presë që qeveria, cilado qeveri të jetë të disponojë instrumenta cudibërës apo formua magjike, që në një situatë si ajo që trashëguam vendin, situata të përmbyset.”- tha Kryeministri.
“Operacioni që po ndërmarrim garanton se kanceri nuk do të vijojë edhe për gjeneratat e tjera. Operacioni siguron se metastazat e kancerit nuk do të vazhdojnë të degradojnë, por përkundrazi do ti japin organizmit një fuqi të re.”- theksoi Kryeministri.
Kryeministri vuri theksin edhe tek akuzat e shpeshta të opozitës se qeverisja e majtë nuk ka rritu asnjëherë pagat dhe pensionet.
“Unë po ju them që vetëm nga ulja e taksave ne kemi garantuar një rritje të barabartë me 4 vite të rritjes së rrogave të qeverisjes së mëparshme.”- tha Rama.
