Përdorimi i teknologjisë në drejtimin e degëve të saj në bazë do të jetë risia e Partisë Socialiste në kuadër të përgatitjeve të fushatës elektorale për zgjedhjet parlamentare që do të mbahen vitin e ardhshëm. Për këtë arsye, Sekretariati i Organizimit Dixhital në PS po punon për instalimin e një programi të posaçëm, i cili do të bëjë të mundur komunikimin e brendshëm mes kryetarëve të degëve me qendrën e PS-së në Tiranë.
Ky program, ndër të tjera, parashikon dhe zhvillimin e videokonferencave apo videombledhjeve mes kryesocialistit Edi Rama dhe krerëve të PS-së në rrethe.
Përdorimi i teknologjisë përveç mbledhjeve, pritet të sjellë edhe më shumë vëmendjen ndaj simpatizantëve, të cilët do të marrin një mesazh urimi të personalizuar në telefonin e tyre nga kreu i PS-së, Edi Rama.
Teknologjia në PS
Alfred Peza, i cili u votua nga 247 anëtarë të Asamblesë Kombëtare si Sekretar për Organizimin Dixhital, sqaroi dje për herë të parë përgjegjësitë dhe funksionimin e kësaj strukture. Në një intervistë dhënë për “Ora News”, Peza u shpreh se shtylla e Sekretariatit që ai drejton do jenë të dhënat e partisë, komunikimi i brendshëm i socialistëve dhe komunikimi me mediat. Sekretariati dixhital do të sjellë risi në organizimin e përditshëm të partisë, si për shembull mbledhjet e kryesocialistit me krerët e bashkive përmes videokonferencës. Sekretariati Dixhital është një strukturë e re për spektrin politik shqiptar, por jo e panjohur për Partitë e Internacionales Socialiste dhe sipas Pezës erdhi si përgjigje e realitetit të ri, që tregon se më shumë se 50 për qind e shqiptarëve informacionin e marrin nga mediat online. “Kolona e parë është “kasaforta” e të dhënave të partisë që përbëhet nga regjistri elektronik i anëtarësisë së partisë, nga listat e votuesve dhe nga listat e burimeve njerëzore dhe të dhënave lidhur me to. Kolona e dytë është komunikimi i brendshëm i PS. PS duke shfrytëzuar teknologjitë dixhitale të informimit do të ketë një rrjet të brendshëm komunikimi nga kryetari i partisë deri tek anëtari i partisë në zonën më të largët të vendit. Dhe kolona e tretë, është komunikimi i jashtëm që është ai me mediat, opinionin publik dhe të gjithë ata qytetarë shqiptarë që na votojnë ose jo, që jetojnë brenda ose jashtë territorit të Shqipërisë”,- u shpreh Peza. Falë kësaj strukture, vijoi ai më tej, do të përforcohet dhe shpejtohet komunikimi mes lidershipit të partisë dhe strukturave, duke dhënë si shembull mbledhjen e kreut të PS me 61 krerët e Bashkisë përmes videokonferencës. “Është i menjëhershëm dhe ajo mbledhje që deri dje bëhej në praninë e të gjithë njerëzve, por për të cilën konsumohej shumë kohë, shumë energji, shumë karburant dhe elementë të tjerë, mund të bëhet fare mirë brenda një momenti me të gjithë anëtarësinë”- nënvizoi deputeti socialist.
Simpatizantët e PS-së
Por, sipas tij, teknologjia do të sjellë edhe më shumë përkushtim për simpatizantët e Partisë Socialiste. “Gjatë ditës së sotme mund të kenë ditëlindjen 274 anëtarë dhe simpatizantë të PS në të gjithë Shqipërinë. Nga 100 e ca mijë anëtarë dhe simpatizantë që kemi dhe kryetari i PS mund t’i dërgojë një mesazh brenda një çasti të gjithëve”- sqaroi Sekretari i PS-së. Alfred Peza, i cili mban mandatin e parë të të zgjedhurit socialist, është ngarkuar nga partia me dy detyra të rëndësishme në kuadër të ri organizimit të partisë në funksion të zgjedhjeve të ardhshme. Peza thotë se kjo detyrë, është krejt e natyrshme për të, si gazetar në profesion. “Qenia zëdhënës politik i Kryesisë së partisë më të madhe politike në Shqipëri dhe aktualisht qeverisja e vendit, është një plotësim edhe më shumë me një kolorit natyror timin, i profilit tim politik” – u shpreh ai. Shqip/ a.k
