Rama: Do të çlirojmë bankat nga korrupsioni
Në një takim mes bankave dhe qeverisë për sfidat e tashme dhe të ardhme të sistemit bankar, kreu i ekzekutivit Edi Rama ka shënjestruar sërish sistemin e drejtësisë, duke thënë se drejtësia e korruptuar po pengon ekonominë.
Duke vënë në dukje mungesën në këtë takim të përfaqësuesve të gjyqësorit, Rama tha se mungesa e kryetarëve të gjykatave është besoj shembull kuptimplotë për faktin se si një drejtësi e korruptuar mund të pengojë ekonominë këtë shembull na e jep sjellja arbitrare e gjykatave dhe gjyqtarëve të korruptuar në raport me ekzekutimin e kolateraleve.
“Mungesa e kryetarëve të gjykatave në këtë tryrezë vihet re, nëse ka një shembull kuptimplotë për faktin se si një drejtësi e korruptuar mund të pengojë ekonominë dhe zhvillimin ekonomik këtë sjellje na e jep sjellja arbitrare e gjykatave dhe gjykatësve të korruptuar në raport me ekzekutimin e kolateraleve. Puna e bërë me uljen e niveleve të kredive të këqija ka një limit dhe këtë limit nuk mund ta kapërcejë as vullneti i bankave për të dhënë më shumë kredi dhe as politikat e qeverisë për të stimuluar kreditimin pasi përcaktohet nga korrupsioni në drejtësi. Ne e kemi marrë me shumë shqetësim çështjen e kredive të këqija si shprehja më kuptimplotë e një ekonomie në krizë”, tha Rama. Kryeministri Rama theksoi se Shqipëria ka ambicie dhe potencial për rritje ekonomike më të lartë se 3%. “2.8, 2.9, 3%, apo rreth këtyre shifrave, nuk është mjaft për ekonominë tonë, nuk është mjaft për ambiciet, por edhe për potencialin tonë. Kemi ambicie dhe potencial për më shumë, për ketë kushtet dhe mundësitë që ka vendi ynë”, deklaroi Rama.
