Fjalimi dhe batutat e përdorura nga Kryeministri Edi Rama dhe homologu i tij serb Aleksandër Vuçiç, kanë pasur si synim sulme ndaj Komisionerit për Zgjerim të BE-së Johannes Hahn.
Kështu e ka cilësuar media austriake “Die Presse” fjalimet e dy kryeministrave në Samitin e Vjenës.
“Kryeministri serb Aleksandër Vuçiç dhe ai shqiptar, Edi Rama, përdorën podiumin në Vjenë për të sulmuar Komisionerin Hahn”. shkruan portali austriak “Die Presse” në artikullin kushtuar Samitit.
Në shkrim vihet re toni kritik për qëndrimin e mbajtur nga kryministri i Serbisë dhe ai i Shqipërisë. Shkrimi vazhdon duke cituar batutat të përdorura nga Rama dhe Vuçiç, që sipas ‘Die Presse’ janë një sulm i qartë ndaj komisionerit Hahn.
“Ne nuk kemi ardhur posaçërisht në Vjenë për të biseduar me shoqërinë civile gjatë gjithë kohës”, tha Rama.
“Por ne mund të themi atë çfarë mund të bëjë Komisioni Evropian”, i’u drejtua ai komisionerit, shkruan artikulli. Por komisioneri Hahn i’u kundërpërgjigj duke thënë që Rama mendon që BE-ja është një bankomat që shpërndan para. “Por BE-ja është më shumë se kaq, ajo është një lidhje me vlerat e përbashkëta”, u shpreh Hahn.
