Kryeministri, Edi Rama dhe kryetarja e Bashkisë së Shkodrës, Voltana Ademi kanë debatuar gjatë inagurimit të stadiumit “Loro Boriçi”.
Rama kritikoi punën e kryebashkiakes së djathtë duke i kërkuar llogari për mos shembjen e ndërtimeve rreth stadiumit.
Batuta në inaugurimin e stadiumit
Përfaqësues të Qeverisë dhe pushtetit vendor në Shkodër inauguruan pasditen e së mërkurës ambientet e rikonstruktuara të stadiumit “Loro Boriçi”.
I pranishëm në këtë ceremoni ishte kryeministri Edi Rama, ministra të kabinetit, kryetarja e Bashkisë së Shkodrës, Voltana Ademi, kreu i FSHF-së, Armand Duka, etj.
Gjatë inspektimit të ambienteve të brendshme të stadiumit, nuk munguan as batutat dhe replikat mes kreut të qeverisë dhe kryetares së Bashkisë.
Fillimisht Rama ironizoi kryetaren e Bashkisë së Shkodrës për mbrojtjen e ndërtimeve pa leje, ndërsa Voltana Ademi iu përgjigj duke thënë se: “Kryeministri nuk jep asnjë lek për Shkodrën”.
Por Rama nuk e la me kaq dhe para se të dilte në tribunën qendrore, iu drejtua gazetarit Dritan Shakohoxha, lidhur me cilësinë e punimeve.
“O Shako, hë mo Shako, përveç atyre ndërtimeve atje, ke ndonjë vërejtje tjetër? U ngrit niveli? Prit se s’ke pa Arenën Kombëtare. Akoma nuk ke pa gjë”, i tha Rama Shakohoxhës.
Panorama/d.i.
