Ka nisur të marrë jetë projekti për ndërtimin e 17 shkollave të reja në Tiranë, i cili do t’i japë zgjidhje përfundimtare mësimit me dy turne. Kryetari i Bashkisë së Tiranës, Erion Veliaj dhe ministrja e Arsimit dhe Sportit, Lindita Nikolla, në prani edhe të kryeministrit, Edi Rama, nënshkruan sot marrëveshjen e bashkëpunimit, e cila mundëson ndërtimin e 17 shkollave të reja në kryeqytet, të cilat do t’i shtohen edhe 3 shkollave të tjera të reja që janë në proces ndërtimi, duke e çuar në 20 numrin e tyre.
Kryeministri Rama vlerësoi se përmes kësaj marrëveshje, materializohet një fazë e gjatë përgatitore dhe çelet rruga për një ndër kantieret më të rëndësishëm të programit të rilindjes urbane, kantieri i ndërtimit të 20 shkollave të reja, që do të bëjnë më në fund diferencën pas 25 vitesh vështirësi prej mbipopullimit dhe mbingarkesës.
“Më vjen mirë që, me Bashkinë e Tiranës, sot lançojmë një projekt që është model i parë i projekteve të programit tonë 1 miliard dollarë për rindërtim, një program i cili do të mundësojë realizimin në kohë shumë të shkurtër të atyre veprave që për ndryshe do donin një kohë shumë të gjatë si pasojë e pamundësisë së arkës së shtetit për t’i financuar. Ky është një program që do të sjellë shumë më afër të ardhmen në raport me disa nevoja jetësore shumë të rëndësishme për infrastrukturë arsimore, shëndetësore, infrastrukturë rrugore të niveleve të ndryshme dhe nga ana tjetër do t’i japë një shtysë të jashtëzakonshme ekonomisë dhe punësimit”, tha Rama.
Kryeministri tha se ky projekt i nisur nga Bashkia e Tiranës lajmëron nisjen e transformimeve të mëdha. “Ajo që po prezantojmë sot me Bashkinë e Tiranës është dallëndyshja e parë që lajmëron një situatë të re transformimesh të mëdha, jo vetëm infrastrukturore, por edhe ekonomike dhe sociale, është një ndërveprim intensiv me sipërmarrjen dhe bankat për të siguruar që, me të njëjtat para që Buxheti i Shtetit, do të investonte në 20 vitet e ardhshme, sepse aq janë mundësitë për të ndërtuar, të mund të ndërtohen 20 shkolla të reja dhe në 20 vitet e ardhshme Buxheti i Shtetit bën shlyerjen e këtij investimi”, tha ai. /b.d
