Kryeministri Rama gjatë vizitës së tij në Vlorë u shpreh se ka nisur epoka e barazisë ndaj ligjit, si dhe reformën në drejtësi nuk e bëri as europianët as amerikanët, por vetëm Partia Socialiste.
“Ajo që ka torturuar Shqipërinë është që nuk ka pasur asnjëherë ndjesi të qartë barazie para ligjit. Po shohim fillimin e një epoke barazie ndaj ligjit. I dobëti me të fortin po trajtohen në mënyrë të barabartë, një qytetar që shkel ligjin shkon para drejtësisë edhe një përfaqësues pushteti shkon para ligjit. Për herë të parë që nga koha që Ismail Qemali ngriti flamurin, kemi politikanë që thirren nga gjykatës dhe gjykohen dhe nuk ka asnjë forcë që i ndalon.
Altin Dumani ka qenë këtu, nuk e kemi sjellë nga hëna. Keni dëgjuar që Dumani të thërras zyrtarë të dorës së tretë dhe të thotë hajde cfarë ke bërë. Kanë ndodhur skandale më të mëdha, kur këtu u vranë njerëz i pari i qeverisë i dha urdhër policisë i tha mos zbatoni urdhërat e prokurorisë. Imagjinoni që sot unë të dal dhe të ndalojë urdhërat e SPAK, vetëm për një arsye. Ne, unë dhe PS e kemi ndarë mendjen që këtij vendi t’i japim drejtësi të pavarur. Jemi ne që e kemi ndërmarrë reformën në drejtësi, as europianët as amerikanët.”
