Kultivuesit e rrushit në Përmet gjenden përballë vështirësive të shitjes së prodhimit, gjë që shkaktohet, sipas tyre, edhe nga futja e prodhimit të importit.
“Prodhimi këtë vit është shumë i mirë, me qenë se edhe moti ishte i mirë. Por tani nuk po na e merr njeri rrushin, na mbeti në vreshta. Unë kam harxhuar 500 mijë këtë vit. Madje tani na duhet edhe ta ruajmë, pasi po na e vjedhin”, shprehet Petraq Tatazi, bujk.
“Tani që po futen prodhime nga jashtë kanë bërë që rrushi që ne prodhojmë të na mbetet pa u shitur”, thotë Nonda Tatazi, bujk.
Për Pëllumb Hodon, specialistit në Drejtorinë e Bujqësisë, problemi vjen pasi në zonë ndodhen vetëm tre kantina përpunuese që e blejnë prodhimin.
“Në rrethin tonë janë 3 kantina vere. Por kapaciteti i tyre dhe mundësitë e tyre nuk e përballojnë dot të gjithë këtë prodhim”, thotë Pëllumb Hodo, specialist i Drejtorisë së Bujqësisë.
Por vetë zotëruesi i njërës prej kantinave pohon për Top Channel se prodhimi i mirë nuk shkon kurrë dëm.
“Fermerëve të mi nuk i ka ngelur ndonjëherë prodhimi. Kemi sakrifikuar veten tonë duke marrë më shumë se kapaciteti dhe më pas na ka ngelur gjendje vere në magazinë”, shprehet Shkëlqim Bejko, agropërpunues.
Në Përmet sivjet është mbjellë një sipërfaqe prej 300 ha me vreshta ku prodhimi mendohet se i kalon 120 kv për hektarë./tch/a.k
