Rajerson, “republika totalitare” dhe mesazhi i kriptuar i Petrit Vasilit

Nënkryetari i LSI Petrit Vasili ishte shumë i pezmatuar sot, që ish-ambasadori amerikan Uilliam Rajerson i sugjeronte nga SHBA deputetëve të PD, që të votonin reformën në drejtësi. Megjithëse Rajerson nuk i drejtohej fare LSI (të cilën ai e di si parti të rreshtuar pro projektit kushtetues), Vasili gjeti kohën t’i kthehet ish-ambasadorit jo pa mllef dhe ironi. Vasili kujtoi kohën kur Rajerson, “bashkë me Berishën, kuptohet”, siç shtoi ai, krijuan republikën e plepave.

Por deri këtu gjithçka mund të shihet si një inat i kuptueshëm ideologjik i një të majti ndaj një ambasadori që ka përkrahur të djathtën. Përtej faktit sesa i majtë është një person si Petrit Vasili, duhet thënë se kritika e tij për ish-ambasadorin pati edhe një koment fundor, që ai e hodhi ashtu si pa dashje, por që nuk ra shumë në sy. Ja deklarimi i Vasilit:

“Ne vetëm nga Ryerson nuk presim këshilla për reformën në drejtësi. korrekt do të ishte një ndjesë e tij për sjelljet e tij jokorrekte, shantazhuese ndaj opozitës të vitit ’92. U kthye në një zëdhënës të opozitës në atë kohë. në atë kohë pati edhe dhunimi të opozitën. Ishte Berisha dhe Ryerson, që kanë “bërë reformën e plepave”, pasojat e së cilës kanë sjellë drejtësinë në këto kushte ku jemi sot. Ryerson duhet të ishte i fundit që të jepte këshilla për reformën në drejtësi. Dhe i pari që nuk duhet të rreshtte se kërkuari ndjesë për situatë ku u futën shqiptarët. Ky ambasador vite më parë në emër të antikomunizmit nxiti krijimin e një republike totalitare. Nuk mundet në emër të një tjetër “anti”, nga antikomunizmi në antikorrupsion, të rikrijojmë një republike të re totalitare…”

Pra, nënkryetari i partisë që e votoi draftin në komisionin e posaçëm thotë diçka që duket sikur ka dalë nga goja e Lulzim Bashës, por që nuk ra shumë në sy. Ai thotë se po rrezikohet të ndërtohet “një republikë e re totalitare në emër të antikorrupsionit”. Pyetja e thjeshtë në këtë rast është se cili po e krijon republikën totalitare dhe se ku duken premisat e saj?! Nëse LSI ka votuar draftin kushtetues, pse e etiketon njëherësh si “republikë totalitare”?

Petrit Vasili e lexoi në një copë letre të shkruar reagimin ndaj Rajersonit. Duket qartë se halli i tij kryesor nuk është djathtizmi i ish-ambasadorit. Reagimi i tij i shkruar ka të bëjë thjesht me hedhjen poshtë të një apeli për të votuar reformën në drejtësi. Ky është nënteksti i vetëm i “republikës totalitare” të nënkryetarit të LSI-së.