Aktorja Rajmonda Bulku rrëfen për gazetën Panorama lëvizjen e shkurtit 25 vjet më parë, kur u rrëzua edhe monumenti i diktatorit Enver Hoxha në sheshin “Skënderbej”.
Bulku thotë se ajo mori mikrofonin para turmës dhe bëri thirrje që turma të zhvendosej nga Televizioni. Pas asaj fjalë që mbajti në rrëzimin e monumentit të Enver Hoxhës, Bulku thotë se mori kërcënime të shumta.
“Jam kërcënuar për një vit rresht. Pa fund, me letra anonime, telefoni nuk pushonte në shtëpi, përfshirë kërcënime edhe nga femra. Letrat anonime vinin nga grupimi i vetëquajtur “Detashmenti i kuq”, që shkruanin se do të më vrisnin, më shanin, më masakronin me fjalë, mua, familjen time, fëmijët e mi. Njëherë e kam njohur një femër nga zëri në autobus, nuk ishte më shumë se 27 vjeç. Po shkoja në Institutin e Fizkulturës me një shoqen time dhe dëgjoj dikë që fliste në autobus. I them: E tmerrshme, ky zë më kërcënon në telefon. Kthehem dhe shoh një vajzë të re, u tmerrova”, tregon Bulku.
