Një prej radiostacioneve më prestigjioze të muzikës jazz, me seli në Berlin, për fiks 30 minuta u ka prezantuar dëgjuesve të vet muzikë shqiptare. “Me motive tonat”, albumi në të cilin këngëtarja Rona Nishliu sjell këngë të vjetra të përpunuara në frymën e jazzit, mbrëmjen e së mërkurës është prezantuar në “Jazz Radio Berlin”. “Me motive tonat” i Rona Nishliu Quartet, është një prej komponentëve të “Shamisë muzikore” që përveç albumit përmban video, material informues në tetë gjuhë mbi kuartetin dhe muzikën, dokumentarin e procesit të punës dhe koncertin promocional të projektit që ishte realizuar në Tiranë.
“Jazz Radio Berlin” që mund të dëgjohet online, siç shkruhet në ueb faqen zyrtare, është i vetmi radiostacion me program 24 orësh të jazzit në Berlin, që i kushton rëndësi llojeve të ndryshme të jazzit. Në këtë radiostacion gjatë gjithë kohës dëgjohen tinguj jazz të gërshetuar me muzikë latine, elektronike, soul e të tjerë.
