Radhë kilometrike janë krijuar në kufirin Poloni-Bjellorusi, ndërsa shoferët rusë e bjellorusë tentojnë të largohen nga Bashkimi Evropian për t’i shpëtuar sanksioneve.
Disa shoferë kanë mbetur të bllokuar për rreth 33 orë në kufi, ndërsa radha shkoi deri në 80 kilometra.
Bashkimi Europian ka ndaluar kamionët nga Rusia dhe Bjellorusia, përveç atyre që transportojnë ilaçe, ose produkte nafte, që të hyjnë ose të qëndrojnë në territorin e saj, si pjesë e një sërë sanksionesh për pushtimin rus të Ukrainës.
Unioni i kishte vendosur afat për largimin nga vendet e BE deri mesnatën e së shtunës.
“Ka ende shumë kilometra… është surreale,” tha një shofer bjellorus, kur u pyet mbi shanset e tij për të kaluar kufirin në kohë.
Megjithatë, është e paqartë se çfarë do të ndodhë me mijëra kamionë të tjerë nga dy vendet që vlerësohet të jenë aktualisht në territorin e BE-së.
Një mundësi është që ato të sekuestrohen nga autoritetet kombëtare.
BE dhe shumë vende të tjera perëndimore kanë vendosur sanksione ndëshkuese kundër Rusisë dhe aleatit të saj kryesor Bjellorusisë. Të dy vendet janë kundërpërgjigjur.
