Qytetet majtas, fshatrat djathtas! Çfarë fshihet pas rezultatit që tronditi politikën gjermane

Zgjedhjet e fundit në Gjermani kanë nxjerrë në pah një ndarje të fortë brenda shoqërisë: në zonat rurale ka fituar më shumë mbështetje AfD-ja, ndërsa qytetet kanë mbetur më të orientuara drejt së majtës.

Sipas politologut Wolfgang Schroeder, profesor në Universitetin e Kassel-it dhe drejtues i qendrës studimore “Das Progressive Zentrum“ në Berlin, kjo ndarje mes periferisë dhe qendrave urbane është një nga zhvillimet më të rëndësishme që partitë gjermane duhet të marrin parasysh.

Një tjetër element i rëndësishëm ishte pjesëmarrja e lartë në zgjedhje.

Schroeder thotë se një pjesë e madhe e rezultatit u përcaktua nga njerëzit që nuk kishin votuar në zgjedhjet e mëparshme. Sipas tij, mobilizimi i këtyre votuesve mund të ndryshojë ndjeshëm rezultatin, pasi ata përbëjnë një grup shumë të rëndësishëm të elektoratit.

Por kush janë të pakënaqurit? Sipas politologut, bëhet fjalë kryesisht për njerëz që nuk gjejnë më përgjigje te partitë tradicionale, si CDU-ja e kancelarit Friedrich Merz dhe SPD-ja. Schroeder e sheh këtë si shenjë të një sistemi politik në ndryshim, ku partitë e mëdha nuk arrijnë më të mbajnë të njëjtin rol që kishin në të kaluarën.

“Njerëzit nuk janë më të gatshëm të pranojnë mënyrën e vjetër të të bërit politikë”, thotë ai. Sipas tij, Gjermania ndodhet përballë një paradoksi: institucionet mbeten të qëndrueshme, ndërsa sistemi i partive po kalon një periudhë krize dhe transformimi.

Në këtë situatë, edhe pozita e kancelarit Friedrich Merz është vënë nën presion. Schroeder thotë se brenda CDU-së ka nisur tashmë diskutimi për një figurë që mund ta zëvendësojë, edhe pse ende nuk është gjetur një emër konkret. Ai pret që një ndryshim në drejtimin e partisë mund të ndodhë në muajt e ardhshëm.

Sipas tij, edhe CDU-ja edhe SPD-ja kanë një problem të rëndësishëm me lidershipin dhe duhet të gjejnë figura të reja, me ide dhe perspektiva të reja, për t’iu përgjigjur ndryshimeve në shoqërinë gjermane.

Sa i përket mundësisë së një bashkëpunimi të ardhshëm me AfD-në, Schroeder nuk pret një aleancë të tillë në muajt e afërt. Megjithatë, ai e konsideron këtë një çështje të hapur për të ardhmen. Gjithçka, sipas tij, do të varet nga mënyra se si AfD-ja do të menaxhojë problemet e saj të brendshme dhe nëse do të jetë e gatshme të bëjë kompromiset e nevojshme për t’u bërë pjesë e një koalicioni.

Mesazhi kryesor i analizës së Schroeder është se Gjermania po ndryshon politikisht: partitë tradicionale po përballen me pakënaqësi në rritje, ndërsa ndarja mes qyteteve dhe zonave rurale dhe mobilizimi i votuesve që më parë nuk merrnin pjesë në zgjedhje po bëhen gjithnjë e më të rëndësishme.

Përshtatur në shqip nga La Repubblica