Një telefonatë në numrin unik të emergjencave, 112, ka shmangur pasoja të rënda në konfliktin me armë mes dy personave, ngjarje kjo e ndodhur në fshatin Baltëz të Fierit.
Telefonata e qytetarit ka raportuar se dy persona po konfliktohen me njëri-tjetrin ndërsa njëri ishte i pajisur edhe me armë automatike.
Forcat e policisë reaguan në kohë duke parandaluar vrasjen e mundshme. 20-vjeçari me inicialet D.V banues në Baltëz, pas një konflikti për motive të dobëta, ka tentuar të vrasë me armë zjarri automatik 53-vjeçarin me inicialet F.T.
Policia ka bërë kapjen dhe arrestimin në flagrancë të 20-vjeçarit, për veprat penale “Vrasja me dashje e mbetur në tentativë” dhe “Prodhimi dhe mbajtja pa leje e armëve dhe municionit luftarak”.
Në cilësinë e provës materiale u sekuestrua arma e zjarrit dhe 1 krëhër me 30 fishekë, njofton policia.
/a.r
