Rreth 5 mije raportime janë bërë në një muaj (janar-shkurt 2018) nga qytetarët në aplikacionin online të Policisë së Shtetit, Komisariati dixhital. Qytetarët kanë adresuar me foto shkelje të ndryshme që ata kanë pikasur, duke sjellë më tej ndërhyrjen e policisë e cila sinjalizohet menjëherë pas denoncimit të bërë në aplikacion.
Zv/ministrja Romina Kuko, e shoqëruar nga Drejtori i Policisë Tiranë, Parë Kastriot Skënderaj dhe nga Zv/drejtori për Sigurinë, Dhimitraq Ziu, inspektoi sallën operative, ku janë të instaluara një sërë aplikacionesh në shërbim të qytetarëve.
Zv/ministrja e Brendshme Kuko, vlerësoi punën e kryer nga ekipi i sallës operative, dhe ka nxitur qytetarët të raportojnë shkeljet e ligjit, pasi në këtë mënyrë, ndihmojnë punën e policisë, parandalojnë ngjarje dhe shpëtojnë jetë, dhe nga ana tjetër, duke denoncuar shkeljet e ligjit, bëhen drejtpërsëdrejti kontributorë mjaft të rëndësishëm, partnerë të Policisë së Shtetit, për rritjen e parametrave të rendit e sigurisë.
“Jam këtu për një vizitë inspektimi në sallën operative të Drejtorisë Vendore të Policisë Tiranë, për inspektimin e aplikacionit të Komisariatit Dixhital dhe gjithashtu të 112 – ës dhe kamerave të trupit. Komisariati dixhital është një aplikacion i cili i jep një përgjigje të shpejtë qytetarëve. Drejtori më informoi se raportimet vazhdojnë të jenë të larta dhe konstante, kështu që nxisim qytetarët që të vazhdojnë ta përdorin këtë aplikacion, sepse Policia do të jetë në një kohë sa më të shpejtë pranë tyre.
Është shumë e rëndësishme që sisteme të tilla të përqafohen nga qytetarët, sepse dhe sot mënyrat e marrjes së informacionit janë të shumëfishta, dhe sigurisht teknologjia është sa më efiçente për të dhënë nje përgjigje”, tha zv.ministrja Kuko.
Nga ana e tij, Drejtori vendor i Policisë Tiranë Kastriot Skënderaj, ka inkurajuar qytetarët që të denoncojnë çdo shkelje të ligjit tek Komisariati Dixhatal, duke i siguruar për ruajtje të anonimatit dhe reagim në kohë dhe të paanshëm.
“Unë u bëj thirrje qytetarëve që të vazhdojnë ta përdorin aplikacionin e komisariatit dixhital. Për çdo rast të raportimit të tyre, ne do të ruajmë anonimatin dhe do t’u japim zgjidhje në kohë problematikave që ata do të raportojnë”, u shpreh Skënderaj.
Komisariati Dixhital është krijuar në Maj të vitit 2015.
Raportimet ndahen në disa kategori: parkime të gabuara/aksident, korrupsion, ndërtime pa leje, dhunë/armëmbajtje, vjedhje dhe ankesa të ndryshme
Nëpërmjet portalit të Komisariatit Dixhital qytetarë të ndryshëm kanë raportuar informacione të vlefshme për të cilat Policia e Shtetit i ka evidentuar dhe ka bërë të mundur, parandalimin e konflikteve, arrestime të shpërndarësve të lëndëve narkotike, parandalime të vjedhjeve, kapje të personave që qarkullojnë me armë etj.
