Kur ka vetëm disa ditë që ka përfunduar afati ( 31 korrik) për dorëzimin online të pasqyrave financiare, Qendra Kombëtare e Regjistrimit njofton se deri tani janë dorëzuar mbi 13,000 aplikime. Dorëzimi i bilanceve në rastin e QKR-së është mbi bazë vullnetare ( ndryshe nga sa ndodh me tatimet) ndaj dhe procesi vazhdon, por gjithmonë i shoqëruar me sanksione. Pra, nëse një biznes do të kërkojë të marrë një shërbim pranë kësaj qendre dhe nuk ka dorëzuar pasqyrat financiare atëherë do të duhet të paguhet gjoba në masën 15,000 lekë.
Në faqen zyrtare e-albania është hedhur një njoftim ku thuhet se : “Aplikimi për depozitimin e pasqyrave financiare, raporteve të auditi dhe të veprimtarisë i kryer jashtë afatit ligjor do të refuzohet, nëse subjekti nuk ka shlyer sanksionin administrativ përkatësisht gjobën në masën 15, 000 lekë të parashikuar në pikën 3, të nenit 74, të Ligjit Nr. 9723/2007. Për të vijuar më tej me aplikimin duhet që të bashkëlidhni edhe mandatin e pagesës së gjobës së derdhur në një nga bankat e nivelit të dytë, mandat i cili për tu klasifikuar si i vlefshëm duhet të përmbajë të dhënat si më poshtë: – Emrin e subjektit; – Numrin Unik të Identifikimit të Subjektit NUIS/NIPT; – Përshkrimi (Depozitimi i pasqyrave financiare, raportit të auditit dhe veprimtarisë pranë QKR për vitin_________)”.
Sipas burimeve zyrtare pranë këtij insitucioni ka pasur edhe raste kur biznesi i ka dorëzuar pasqyrat financiare me mangësi në dokumentacion dhe aplikimi nuk është konsideruar i vlefshëm. Edhe në këtë rast biznesi i nënshtrohet masave ndëshkimore./Monitor/
