Tregu i qirave afatshkurtra në Shqipëri po zgjerohet dhe tashmë përfshin jo vetëm Tiranën, por edhe qytetet bregdetare dhe destinacionet turistike.
Tirana mbetet tregu më i qëndrueshëm gjatë gjithë vitit, falë turizmit, udhëtimeve për biznes dhe qëndrimeve të shkurtra. Në gjysmën e parë të vitit 2026, kryeqyteti regjistroi rreth 63 mijë net-qëndrime në muaj dhe gjeneroi rreth 16.3 milionë euro të ardhura.
Në bregdet, situata është ndryshe. Vlora, Durrësi, Golemi dhe Saranda kanë kërkesë më të fortë gjatë verës, por edhe tarifa më të larta. Vlora regjistroi mbi 110 mijë net-qëndrime vetëm në qershor dhe rreth 15.5 milionë euro të ardhura në gjashtë muajt e parë të vitit. Durrësi gjeneroi rreth 7.7 milionë euro.
Sa i përket tarifave, mesatarja për një natë në gjysmën e parë të vitit ishte rreth 42.4 euro në Tiranë, 48 euro në Vlorë, 49.4 euro në Durrës dhe 51.3 euro në Golem.
Në qershor, çmimet në bregdet u rritën ndjeshëm, duke arritur rreth 75 euro në Vlorë, 76 euro në Durrës dhe 72 euro në Golem.
Edhe zënia e apartamenteve ndryshon sipas destinacionit. Tirana kishte një normë zënieje prej 63.6% në qershor, ndërsa Vlora arriti në 62.2%, Durrësi në 60.3% dhe Golemi në 57.9%.
Nëse një apartament jepet me 50 euro nata dhe qëndron i zënë për 15 ditë në muaj, të ardhurat bruto arrijnë në rreth 750 euro.
Megjithatë, nga kjo shumë duhen zbritur shpenzimet për mirëmbajtje, pastrim, taksa dhe periudhat kur prona qëndron bosh.
Të dhënat tregojnë se leverdia më e madhe në muajt e sezonit është në zonat bregdetare, ku çmimet ditore rriten ndjeshëm dhe kërkesa përqendrohet në verë. Tirana, nga ana tjetër, ofron më shumë stabilitet gjatë gjithë vitit, por me tarifa më të ulëta dhe konkurrencë më të madhe.
Për këtë arsye, blerja e një apartamenti për ta dhënë me qira afatshkurtër mund të jetë më fitimprurëse në bregdet, sidomos në zona pranë plazhit dhe me kërkesë të lartë turistike. Megjithatë, vendndodhja, cilësia e pronës, sezonaliteti dhe norma e zënies janë faktorët kryesorë që përcaktojnë nëse investimi ia vlen.
/Marrë nga Monitor
