Vetëm pak orës pas hyrjes në fuqi të marrëveshjes së nënshkuar mes Bashkimit Europian dhe Turqisë, roja bregdetare turke dhe forcat e sigurisë kanë kapur qindra klandestinë në brigjet e vendit, duke i kthyer më pas në qendrat turke të ngritura posaçërisht për ta. Emigrantët kanë refuzuar kthimin, ku kanë kërkuar të vijojnë udhëtimin drejt Europës.
Menjëherë pas hyrjes në fuqi të marrëveshjes, autoritetet turke kanë kthyer mbrapsht qindra emigrantë që i kanë kapur në brigjet e vendit.
Shumica prej tyre, menjëherë sapo kanë arritur në qendrat turke të regjistrimit kanë kërkuar të lejohen të vijojnë udhëtimin e tyre drejt Europës.
Rreth 200 persona, kryesisht sirianë, u kapën në brigje nga forcat turke të sigurisë dhe pasi u mbajtën pothuajse një ditë në një anije, u dërguan me autobus në qendrat e regjistrimit.
Teksa prisnin në oborrin e qendrës së regjistrimit, ata bërtisnin: Na lini të kalojmë! Përfshirë një vajzë të re, e cila dukshëm kërkon dëshpërimisht të vijojë udhëtimin, duke bërtitur se babai i saj është shumë i sëmurë.
Bregdeti, plazhet dhe pyjet e zonës së njohur turiste të Ayvalik, një pikë e nxehtë për emigrantët që kalojnë në Evropë, gjatë gjithë ditës së diel kanë qenë të qeta.
Një tregtar i zonës u shpreh se numri i emigrantëve është reduktuar ndjeshëm gjatë dy ditëve të fundit. Turqia dhe Bashkimi Europian nënshkruan marrëveshjen që synon të ndalojë emigrantët të kalojnë në Greqi. Sipas saj, të gjithë klandestinët që hyjnë në Greqi do të kthehen pas në Turqi nëse nuk aplikojnë për azil apo nëse kërkesa e tyre refuzohet.Oranews
