Qeveria është zhvendosur në Fier në mbledhjen e radhës. Pas përfundimit të mbledhjes, kryeministri Edi Rama në një deklaratë për mediat ka sqaruar vendimet që janë marrë nga paketa e investimeve për turizmin, te investimet në bujqësi, por edhe zgjerimin e listës së barnave të rimbursueshme dhe zgjidhjen përfundimtare për herceptinën, medikament për trajtimin e kancerit të gjirit.
“Lista e barnave të rimbursueshme është zgjeruar për të mbuluar shtresat në nevojë. Janë 36 barna të reja që do të rimbursohen nga shtetit dhe ku do të përfshihet si një zgjidhje përfundimtare edhe herceptina, një medikament jetik për kancerin e gjirit, që ka një trajtim të shtrenjtë”, tha Kryeministri.
Pacientët me kancer gjiri duhet të trajtohen me herceptinë, një herë në tre javë, pa ndërprerje. Herceptina është medikament shumë i shtrenjtë. Një seancë me herceptinë kushton 2000 euro. Një grua e diagnostikuar me kancer gjiri kërkon 18 të tilla.
Gjithashtu Rama tha se është hartuar një dokument orientimi të zhvillimit përmes investimeve të integruara publike dhe një sërë ndërhyrjesh prioritare në këtë qark nga 2018-2021. Ai premtoi se shumë shpejt do të nisë puna për përfundimin e bypass-it të Fierit dhe rrugës Fier-Seman.
Kryeministri përmendi edhe linjën e interkonjeksionit Fier-Elbasan-Maqedoni, si dhe inceneratorit, që thotë se do të zgjidhë problemin e menaxhimit të mbetjeve, por edhe do të prodhojë energji pa ndotje.
“Kemi miratuar një dokument dhe një paketë ndërhyrjesh në qarkun e Fierit dhe deri në 2021. Një pikë e veçantë që gëzon mbështetje është sektori i turizmit. Apolonia dhe Ardenica janë dy qendra me rëndësi. Inceneratori në Fier është jnë tjetër investim. Përfundimi i By-Pass-it të Fierit është një plagë e hapur.Për Divjakën është hapur drita jeshile për ngritjen e 800 hektarëve të tjera platancione, shegë, avokado dhe disa fruta të tjerë të volitshme në fushën e eksporteve. Dy vendime me impakt kombëtar janë; lista e re e barnave të rimbursueshme e cila është zgjeruar dhe përveç 36 barnave të reja do të përfshihet si zgjidhje përfundimtare edhe herceptina, për trajtimin e kancerit të gjirit, do të përfitohet falas dhe do të mbulohet tërësisht nevoja në të gjitha spitalet. Më në fund bëhet realitet një zotim me peshë jo të vogël financiare. “, deklaroi Rama
Vendimi tjetër i qeverisë, ishte ai për biznesin, konkretisht prodhuesit bujqësorë.
“Kemi marrë një vendim të rëndësishëm për biznesin. Një vendim që incentivon prodhuesit bujqësorë që zhvillojnë veprimtari ekonomike në kuadër të një sipërmarrjeje. Për të gjithë prodhuesit bujqësorë ka qenë një problem, kapërcimi i masës 5 mln të reja të xhiros për shkak të përfshirjes në TVSH. Ajo që bëjmë me këtë vendim është se ju themi të gjithë prodhuesve bashkohuni për të mos paguar TVSH mbi xhiron. Një bashkim fermerësh mund të ketë një xhiro shumë më të lartë se 5 mln, nuk do të jetë subjekt i TVSH-së. Ka një interes shumë të madh që të realizohet bashkimi. Është një nxitje e mëtejshme për të krijuar premisa për bashkime që janë të domosdoshme për të pasur shumë më tepër impakt në të gjitha aspektet kur vjen puna tek vlera e prodhimit bujqësor dhe fondet e BE-së. Bashkohuni sepse është në interesin e çdo fermeri dhe ekonomisë kombëtare”, tha kryeministri.
a.ç
