Qeveria ka miratuar një vendim në mbledhjen e Këshillit të Ministrave që i hap rrugë mundësisë së dhënies me konçension të hapësirave publike biznesit privat. Vendimi i jep mundësinë njësive të qeverisjes vendore që hapësirat që ato nuk i menaxhojnë dot vetë, t’i jepen me marëveshje partneriteti privatit. Bëhet fjalë për disa lloje shërbimesh që mund të jepen me konçension, si psh menaxhimi i parkimeve publike, i shërbimeve nëpër parqe apo lulishte, etj.
Për rastet kur këto hapësira shtrihen në pronë private, qeveria sqaron se njësia e qeverisjes vendore përkatëse bie fillimisht dakord me pronarin për zhvillimin e hapësirës.
Në rast të pamundësisë së këtij të fundit për ta zhvilluar, pushteti vendor ia merr këtë hapësirë kundrejt një tarife të caktuar, për t’ia dhënë një tjetër privati për ta zhvilluar. Qeveria thotë se vlerësimi në këtë rast, sa i përket qëllimit të kryerjes me efikasitet apo kosto më të ulët të këtyre shërbimeve, i përket qeverisjes vendore. Miratimi i këtij vendimi, sipas qeverisë, është i rëndësishëm në kushtet kur hapësirat publike në shërbim të komunitetit po tkurren gjithnjë e më shumë në favor të interesit privat.
Për këtë qëllim, vendimi parashikon ndalimin e zënies së hapësirës publike me çdo lloj objekti, perveç se me autorizim të bashkisë apo ndalimin e zënies së parqeve dhe lulishteve në masë më të madhe se 0.5% e tij.
Bashkitë po ashtu duhet të parashikojnë krijimin e hapësirave publike në planet e tyre vendore si rrugë, lulishte, trotuare apo kopshte e çerdhe dhe të rakordojnë me zhvilluesit kushtet për zbatimin e planeve dhe kalimin e që do të ndërtohen në pronësi të bashkisë përkatëse.
