Qeveria qendrore e Spanjës ka dorëzuar ankimimin e saj në Gjykatën Kushtetuese të vendit gjatë kësaj të mërkure, e cila synon të bllokojë rrugëtimin drejt pavarësisë të nisur nga Asambleja rajonale e Katalunjës, dhe ruajtjen e unitetit kombëtar spanjoll.
Parlamenti rajonal i Katalunjës miratoi një rezolutë gjatë kësaj jave, përmes së cilës bëhet thirrje për mëvetësim nga Spanja dhe përcaktohet plani për krijimin e Republikës së Katalunjës brenda 18 muajve, duke nisur me ngritjen e institucioneve të para shtetërore siç janë zyrat e tatim-taksave. Deklarata e miratuar të hënën zotohet specifikisht se do të injorojë vendimin e Gjykatës Kushtetuese të Mbretërisë së Spanjës.
“Ky nuk është thjesht një reagim ndaj një mocioni të miratuar në Parlamentin rajonal, por është një veprim në mbrojtje të të gjithë vendit”, tha kryeministri spanjoll Mariano Rajoy, teksa fliste në një konferencë për shtyp pas mbledhjes së kabinetit të tij qeveritar. Ai u shpreh se rajoni verilindor nuk duhet lejuar të ndahet nga Spanja.
Debati mbi Katalunjën është përshkallëzuar në mënyrë dramatike gjatë javëve të fundit, teksa Mbretëria pritet t’u drejtohet zgjedhjeve kombëtare në dhjetor, duke dominuar fushatat politike të partive si ajo e Rajoyt (Partia Popullore e qendrës së djathtë), e cila bën thirrje për unitet në Spanjë, e duke zbritur diskutimet mbi ekonominë në një rol dytësor, pavarësisht se papunësia ka shkuar në 20%.
“Kjo është një shpërfillje e hapur ndaj institucioneve shtetërore. Ata po mundohen të bëjnë hapa kundër demokracisë, por unë nuk do ta lejoj këtë gjë”, deklaroi Rajoy.
Rajoni verilindor i Spanjës, më i populluari dhe më i industrializuari, përbën rreth një të pestën e prodhimit kombëtar të Mbretërisë. Megjithatë, ai rajon zotëron gjuhën (dialekt) dhe kulturën e vetë, dikur ka qenë prodhues tekstilesh, ndërsa tani synon të shfaqet si një qendër teknologjike. Por, të mos harrojmë se plazhet mesdhetare dhe Barcelona, kryeqyteti tepër i pasur në aspektin artistik i Katalunjës, përbëjnë edhe një burim të jashtëzakonshëm të ardhurash nga turizmi. /Top Channel
