Në një deklaratë për shtyp, deputetja e Partisë Demokratike Liliana Elmazi akuzoi Ministrinë e Mbrojtjes se ka ndryshuar kriteret e tenderit për blerjen e makinave të blinduara, duke i përshtatur me profilin e kompanisë ku janë blerë. Gjithashtu deputetja Elmazi përsërti akuzën mbi tenderin e rikonstruksionit të godinës së Ministrisë së Mbojtjes, ku sipas saj kompania fituese e tenderit është një firmë pastrimi.
Ndërsa akuza e tretë ka të bëjë me tenderin për blerje, furnizim, instalim dhe vënie në punë të Sistemit të Integruar të Vëzhgimit të Hapësirës Detare, ku deputetja Elmazi pretendon se procedura është zhvilluar e mbyllur, ndërsa fitues është shpallur një dyqan celularësh.
Por qeveria sqaron se VKM-ja e tetorit 2008 për prokurimet ushtarake, përcakton qartë se procedurat e blerjes dhe prokurimeve nga Ministria e Mbrojtjes janë të përjashtuar nga ligji i prokurimit publik. Bazuar në këtë VKM, kërkesa operacionale nuk përmban as fond limit, as analizë kostoje dhe as analizon operatorët e mundshëm ekonomikë. Ndërkohë që përcaktimi i vlerës së projektit bëhet vetëm nga grupi i punës i përbërë nga ekspertë të fushës. Pas miratimit nga bordi i modernizimit, alternativa që plotëson më së miri kushtet teknike kthehet në projekt të zbatueshëm.
“Alternativa për të cilën Partia Demokratike pretendon se është abuzuar, është përzgjedhur si alternativa më e mirë nga grupi i punës dhe më pas i është dërguar kompanive të listuara nga NATO për çmim dhe disponibilitet. Vlen të theksohet se oferta e përzgjedhur fituese është 530 mijë euro më e ulët se oferta fillestare e dhënë nga e njëjta kompani dhe kjo falë negociatave të zhvilluara nga Ministria e Mbrojtjes. Ndërkohë që për akuzat e tjera të deputetes Liliana Elmazi, ripërsërisim se për sa i përket tenderit për rikonstruksionin e Ministrisë së Mbrojtjes, procedura e zhvilluar ka qenë e hapur për të gjithë operatorët e interesuar si dhe konform kuadrit ligjor në fuqi. Në këtë garë kanë marrë pjesë 17 firma, ndërsa fituesi nuk është një shoqëri ashtu si pretendohet në artikujt e portaleve, por bashkimi i dy operatorëve ekonomik, operatorit “Rei” sh.p.k. dhe operatorit “Infinit Construction” sh.p.k.” – shkruhet në transparenca.al
Qeveria thekson se pretendimet se kompania e shpallur fituese nuk përmbush kriteret dhe nuk ka përvojën e nevojshme në fushën e ndërtimit janë të pabazuara. Konkretisht, si shoqëria “Infinit Construction” sh.p.k. ashtu edhe “Rei” sh.pk., kanë si objekt të veprimtarisë së tyre tregtare ndërtimin dhe rikonstruksionet e objekteve të ndryshme. “Së dyti, bazuar në aktivitetin e deklaruar në QKR, të dyja shoqëritë janë të pajisura me licencë për ushtrim veprimtarie ndërtuese zbatimi, për të gjitha kategoritë e kërkuara në zbatimin e kontratës si dhe drejtuesit teknikë për çdo kategori punimesh të parashikuar në preventiv” – thuhet në reagim.
“Lidhur me tenderin për blerje, furnizim, instalim dhe vënie në punë të Sistemit të Integruar të Vëzhgimit të Hapësirës Detare, ndryshe sa pretendohet në artikuj, kompania e përzgjedhur është përfaqësuesi zyrtar i kompanisë “GEM Elektronika”, prodhues i këtyre radarëve. Po e njëjta kompani, është marrë me mirëmbajtjen dhe riparimin e pajisjeve përgjatë periudhës 2010 – 2011. Ajo është certifikuar nga DSIK që në vitin 2010, kohë në të cilën ofronte riparimin e radarëve pranë Forcave të Armatosura. Fakti që e njëjta kompani me eksperiencë vazhdon të mirëmbajë rrjetin përbën një avantazh, i cili nuk u shfrytëzua në vitet 2012-2013 dhe si pasojë i gjithë vëzhgimi i hapësirës detare u la në errësirë të plotë” – përfundon sqarimi i qeverisë.
