Ilir Yzeiri
Fjalimet e Bashës apo të Berishës në çadër janë bërë të neveritshme, të lodhshme, të mërzitshme dhe pa asnjë kuptim më. Në politikë ligjërimi është arsyetimi për të nisur një aksion, një veprim. PD-ja i kaloi të 40-tat e ditëve duke recituar e duke klithur në shesh dhe si përfundim nuk po arrin të bindë askënd për të nisur veprimin që do ta ndryshojë gjendjen që ajo paraqet me anë të monologëve të mërzitshëm në çadër.
Në qoftë se opozita do të bindë opinionin vendas dhe atë të huaj, ajo, pas artikulimit të tekstit të mërzitshëm me titullin “qeveria –palë me krimin”, do të duhej të niste aksionin politik që ta zhbllokojë gjendjen.
E para, lutjet qaramane për qeveri teknike janë të pambështetura në asnjë instancë juridike dhe nuk mund të realizohen. Këtë opsion nuk e mbështet askush.
E dyta, nëse opozita po na terrorizon me klithmën se qeveria është palë me krimin, tani ajo duhet të nisë të na tregojë me fakte krimin dhe kriminelët. Nga përvoja e derisotme, vende të mbytyra me krim apo që nuk administrohen nga qeveria qëndrore ka shumë. Për një kohë të gjatë Italia e Jugut, kishte territore të tëra që kontrolloheshin nga mafia. Në atë vend krimi është i identifikuar me emër konkret dhe me organizata konkrete. Tani opozita duhet të na tregojë me emra konkretë dhe me organizata konkrete se cilët janë ata kapo të mafies dhe ato organizata kriminale që bashkëpunojnë me qeverinë, që drejtojnë qeverinë dhe që po e mbysin jetën e vendit.
E treta, opozita duhet të nisë të bllokojë jetën politike të vendit në mënyrë që të prodhojë krizën e domosdoshme për të detyruar qeverinë që të japë dorëheqje dhe për të kaluar në Parlament dhe aty të maten forcat dhe të shihet nëse koalicioni i sotëm qeveritar i ka numrat për të qeverisur ende apo duhet të zhbëhet e të kalohet në qeveri teknike.
E katërta, opozita duhet të sigurojë të paktën një aleat ndërkombëtar që ta mbështesë në kauzën e saj.
E fundit, PD-ja duhet të mbajë parasysh se ajo nuk e ka monopolin e së vërtetës. Që të bindë shqiptarët dhe ndërkombëtarët për vërtetësinë e akuzave që bën, ajo duhet të na tregojë se çfarë është në gjendje të bëjë. Nëse di vetëm të ulërasë në Bulevard dhe të hajë fara luledielli duke recituar një tekst të mërzitshëm, atëhere le të vazhdojë, spektatorët i ka, vendin e po ashtu.
