Ministri i Drejtësisë, Ulsi Manja, nuk pajtohet me kreun e SPAK-ut, Altin Dumani, sipas të cilit gjatë vitit 2023, qeveria nuk ka qenë shumë bashkëpunuese me SPAK-un në denoncimin e rasteve të korrupsionit.
Rënien me 40% të referimeve nga ana e institucioneve qeveritare për rastet e korrupsionit, zoti Manja nuk e interpretoi si mungesë vullneti për të luftuar korrupsionin, por krejt të kundërtën.
Ai mbrojti tezën e rënies së nivelit të korrupsionit.
“E kam dëgjuar raportimin e drejtuesit të SPAK-ut, por unë kam një lexim tjetër. Pse të mos e marr në këndvështrimin e parandalimit që ka dhënë goditja e luftës kundër korrupsionit për shkak të punës që bëjnë agjencitë ligjzbatuese?” tha Ministri i Drejtësisë për emisionin “Pa censurë” në RTSH, duke vënë theksin tek masat antikorrupsion të qeverisë.
“Në nivelin makro, qeveria ka marrë një sërë masash që shkojnë në drejtim të luftës efektive kundër korrupsionit. Ne sot japim 1300 shërbime online. Siç e lexoj unë, ka dhënë efektivitet lufta kundër korrupsionit nga agjencitë ligjzbatuese, ku, padiskutim, SPAK-u, si strukturë e dedikuar dhe si strukturë e posaçme, që udhëheq hetimet në këtë drejtim, ka dhënë parandalimin,” u shpreh Ministri i Drejtësisë, i cili vlerësoi se rënia me 6 raste në vitin 2023, krahasuar me vitin 2022, nuk të çon në analizën e drejtë për të vlerësuar vullnetin e qeverisë për luftën kundër korrupsionit.
PJESË NGA INTERVISTA E MINISTRIT TË DREJTËSISË PËR EMISIONIN “PA CENSURË”
Elona Meço: Kreu i SPAK-ut ka ngritur shqetësimin se ka rënë bashkëpunimi i qeverisë me SPAK-un për të denoncuar korrupsionin. Ai tha se ka rënë me 40% numri i rasteve të denoncuara nga qeveria dhe institucionet e saj. Nuk ka vullnet për të luftuar korrupsionin apo ka diçka tjetër?
Ulsi Manja: E kam dëgjuar raportimin e drejtuesit të SPAK-ut, por unë kam një lexim tjetër. Pse të mos e marr në këndvështrimin e parandalimit që ka dhënë goditja e luftës kundër korrupsionit për shkak të punës që bëjnë agjencitë ligjzbatuese? SPAK-u u krijua në vitin 2019 dhe sot jemi në vitin 2024. Nuk do të ndihesha mirë, nëse në këto 4 vite e ca jetë jetë të kësaj strukture të posaçme, të dedikuar në luftën kundër korrupsionit, të mos jetë përçuar si duhet mesazhi i parandalimit në institucionet publike.
Elona Meço: Pra ju e lexoni këtë si një rënie të nivelit të korrupsinit, edhe pse Departamenti i Shtetit, psh thotë se korrupsioni është i shumë i përhapur, endemik?
Ulsi Manja: E lexoj si mesazh parandalimi, pra në këtë këndvështrim. SPAK-u e lexon në këndvështrim më të ngushtë, të asaj që lidhet me veprimtarinë e strukturës së posaçme. Por në nivelin makro, qeveria ka marrë një sërë masash që shkojnë në drejtim të luftës efektive kundër korrupsionit. Ne sot japim 1300 shërbime online. Pastaj, a është kampioni i analizës për të arritur në konkluzionin që qeveria nuk bashkëpunon? Nuk dua të bie në kurthin e shifrave, por kampioni është shumë i vogël. Në vitin 2022 kanë qenë 19 referime nga institucionet publike për vepra penale korruptive në SPAK, në 2023, që është dhe kampioni i analizës, ka rënë në 12, pra me 6 procedime më pak. Megjithatë, vazhdoj ta lexoj, siç e lexoj unë: ka dhënë efektivitet lufta kundër korrupsionit nga agjencitë ligjzbatuese, ku, padiskutim, SPAK-u, si strukturë e dedikuar dhe si strukturë e posaçme, që udhëheq hetimet në këtë drejtim, ka dhënë parandalimin.
Gazetare: Elona Meço
