Qeveria ka kaluar dje pasdite, përmes një akti normativ, vendimin për shpërblimin e pensionistëve. Do të jenë rreth 600 mijë pensionistë, të cilët do të shpërblehen sipas skemës së vitit të kaluar, por paratë ata do t’i tërheqin në muajin janar, shkruan gazeta Shekulli. Dje paradite, ishte ministri i Financave, Shkëlqim Cani, i cili lajmëroi se këtë fundvit pensionistët dhe familjet shtresat në nevojë do të përfitojnë nga fondi i veçantë prej 1.5 miliardë lekësh, përmes aktit normativ. Duke mos dhënë hollësi për shifrat apo ndarjen e shumave të caktuara, Cani lajmëroi se skema do të jetë e njëjtë me atë të vitit që shkoi dhe kategoritë përfituese do të marrin shumën 2 mijë apo 3 mijë lekë sipas kategorisë.
“Qeveria merr vendimin për shpërblimin e pensionistëve dhe shtresave në nevojë”. Ndërkohë, pas miratimit të vendimit, institucioni përgjegjës për zbatimin e tij, është Instituti i Sigurimeve Shoqërore, i cili do të hartojë dhe kalendarin e datave për tërheqjen e shumave gjatë muajit janar, në harkun kohor të një jave që do të përcaktohet. Ashtu si dhe vitin e kaluar, pensionistët dhe shtresat në nevojë do të duhet t’i drejtohen filialeve të Postës Shqiptare për të marrë paratë.
Skema
Fondi i shpërblimeve në total parashikohet në 1.5 miliardë lekë, të cilat do të ndahen sipas variantit të përdorur një vit më parë. Për pensionistët kryefamiljarë, të vetmuar apo në çift, për familjet në ndihmë ekonomike dhe për personat me aftësi të kufizuara do të jepet një shpërblim prej 3 mijë lekësh, ndërsa për pensionistët e tjerë, shpërblimi do të jetë 2 mijë lekë. Në skemë këtë vit, bazuar në të dhënat e Institutit të Sigurimeve Shoqërore, janë afro 615 mijë pensionistë, të cilët do të përfitojnë shumën simbolike. Por, si janë ndarë kategoritë përfituese për shpërblimet e fundvitit? Për përfitimin e lekëve, është marrë parasysh statusi që kanë pensionistët në familje, nëse janë kryefamiljarë, apo nëse janë të vetëm. Për këtë arsye, edhe shuma që do të ndahet do jetë në varësi të këtij statusi që ka secili pensionist.
Sipas kategorive, 90 mijë familje pensionistësh përfitojnë 5 mijë lekë shpërblim, nga të cilat 3 mijë lekë kryefamiljari dhe 2 mijë lekë bashkëshortja e tij. Për të gjithë pensionistët e tjerë, masa e shpërblimit është llogaritur në vlerën 2 mijë lekë. Përfitues të kësaj mase shpërblimi do të jenë pensionistët (e qytetit) me pension urban, invaliditeti dhe familjar. Po ashtu, pará nga fondi i kontigjencave do të marrin edhe pensionistët që përfitojnë pension fshati pleqërie, familjar dhe invaliditeti. Në këtë kategori llogariten të jenë afro 150 mijë individë. Vendimi shpall një shpërblim prej 5 mijë lekësh për ishtë përndjekurit mbi 65 vjeç dhe veteranët. Por së bashku me kontingjentin e të moshuarve, qeveria ka miratuar edhe fond të posaçëm për personat me aftësi të kufizuara, të cilët do të marrin, gjithsecili nga 3 mijë lekë.
Për realizimin e aktit punuan tri ministritë e linjës, ajo e Financave, Ekonomisë e Mirëqenies Sociale dhe Rinisë, ku deri në sigurimin e fondit u ngrit dhe një skemë tjetër, e cila shpërblente të gjithë pensionistët dhe familjet në nevojë, me nga 2 mijë lekë secili. Por, kjo skemë u rrëzua nga qeveria, duke ia lënë vendin asaj që u miratua vetëm 3 ditë parë natës së ndarjes së viteve. Ndryshe nga viti i kaluar, kur pensionistët i siguruan lekët për darkën e Vitit të Ri brenda muajit dhjetor, tashmë ata do të thirren për tërheqen e lekëve në fillim të muajit janar. Sa i përket administratës, qeveria ka miratuar disa ditë më parë vendimin për shpërblimin e policëve, ndërsa nuk ka pasur sinjalizime për shpërblimin e mësuesve apo mjekëve.
Të dhëna
Shpërblimin e pensionistëve këtë vit, i pari që e lajmëroi ishte kryetari i komisionit të Ekonomisë, Erjon Braçe, i cili në mbledhjen e fundit të komisionit që ai drejton tha se tri ministritë e linjës po hartojnë skemën për ndarjen e shpërblimeve.
Përfituesit
Qeveria ka miratuar vendimin për shpërblimet e policëve, por nuk ka pasur vendim zyrtar për shpërblimin e mësuesve dhe mjekëve, përpos thirrjeve të sindikatave. Në skemën e vjetshme, qeveria përfshiu në shpërblime, krahas policëve shembullorë, edhe arsimtarët e 10 shkollave më të mira në vend. E njëjta skemë u zbatua edhe për shërbimin shëndetësor, duke iu shpërndarë 400 mijë lekë shpërblim për individ, për 3 shërbimet më të mira shëndetësore.
Do të marrin shpërblim, 340 mijë persona, që përfitojnë pensione urbane pleqërie, invaliditeti dhe familjare;
150 mijë persona, që përfitojnë pension fshati pleqërie, invaliditeti dhe familjar;
11500 persona, që përfitojnë pensione të parakohshme për vjetërsi shërbimi;
4300 persona, që përfitojnë trajtim të veçantë financiar si ish-punonjës të nëntokës, ose ndërmarrjeve të industrisë ushtarake.
615 mijë pensionistë, nga muaji janar duhet t’u drejtohen zyrave të Postës Shqiptare për të tërhequr shpërblimin e përcaktuar nga qeveria, përmes aktit normativ
SHEKULLI
