Ministria e Infrastrukturës dhe Energjisë ka nxjerrë për konsultim publik një projekt vendim i cili synon rritjen e efiçencës së energjisë së ndërtesave.
Me anë të kësaj strategjie, qeveria ka për qëllim dekarbonizimin e stokut të ndërtesave, duke reduktuar ndjeshëm emetimet e gazeve me efekt serrë dhe duke kontribuar në arritjen e objektivave të Marrëveshjes së Parisit.
Strategjia thekson se ndërtesat e banimit shfrytëzojnë kryesisht energjinë elektrike për plotësimin e kërkesave të tyre për ngrohjen, ftohje dhe ndriçimin.
Duke marrë parasysh këto fakte, qeveria vlerëson se është i domosdoshëm miratimi i një skeme financiare mbështetëse për nxitjen e investimeve në stokun e banesave me qëllim reduktimin e kërkesës për energji si dhe zbutjen e efekteve që do të sjellë kalimi gradual në një treg të liberalizuar të energjisë për konsumatorët.
Në vendimin e propozuar parashikohen disa mënyra për uljen e konsumit të energjisë duke analizuar ndërtesat sipas zonave klimatike si dhe duke i ndarë në disa grupe apo tipologji që kanë banesat.
Sipas projektit qeveria merr parasysh mbështetjen financiare si dhe specifikat apo format e subvencionit që mund të jepet për të nxitur kursimin e energjisë.
Për konsumatorët fundorë, strategjia parashikon formën e granteve dhe kredive të buta me afat të gjatë.
Efektet financiare për rinovimet që do kryhen, do përballohen nga buxheti i shtetit për institucionet e qeverisjes qendrore.
Ndërsa institucionet e qeverisjes vendore, në varësi të situatës mund të kërkojnë mbështetje financiare nga qeverisja qendrore.
Zbatimi i projekt-vendimit pritet të ketë përfitime të rëndësishme ekonomike, mjedisore dhe sociale.
Në aspektin ekonomik, ulja e konsumit të energjisë do të reduktojë kostot për qytetarët dhe bizneset, ndërsa do të krijohen vende pune dhe do të nxitet zhvillimi i teknologjive të gjelbra.
I vetmi subvencion real, i thjeshtë dhe i shpejtë është që qeveria të subvencionojë çdo ndërtesë private apo pallate me instalimin e paneleve diellore. Në këtë mënyrë çdo objekt të prodhojë për konsum vetjak, por edhe nëse ka teprica, të kalojnë në rrjet si një mënyrë e kthimit të subvencionimit. Kjo gjë është më efiçentja. Të tjerat janë “prit gomar të mbijë bar”. Dmth le të bëhen dhe këto të tjerat sepse plus është, por ndërkohë të shfrytëzojmë energjinë që na jep Dielli ynë.