Kryeministri i Greqisë, Kyriakos Mitsotakis ka njoftuar se do të rrisë pagën minimale nga 830 euro në 880 euro. Ai u shpreh se synon që në fund të mandatit 4 vjeçar paga minimale të shkojë 950 euro.
Mitsotakis iu referua uljes së nivelit të papunësisë, duke theksuar se politika e krijimit të vendeve të punës ka filluar të japë fryte.
Po ashtu, rritje ka pësuar edhe asistenca sociale për të papunët, të cilët do të marrin 540 euro. Gjithashtu është rritur edhe paga për punonjësit e martuar me tre vite eksperiencë. Ata do të marrin 1258.4 euro, ndërsa punëtorët e pakualifikuar do të marrin 39.4 euro në ditë. Këto ndryshime do të hyjnë në fuqi nga data 1 prill.
Kjo është rritja e 5-të e pagës bazë që nga viti 2019. Rritja kumulative gjatë gjashtë viteve arrin në 35.4%. Fitimi për punëtorët tani është i barabartë me afërsisht 5 paga minimale shtesë të vitit 2019 në vit.
Nga këto rritje përfitojnë edhe të gjithë emigrantët shqiptarë që jetojnë dhe punojnë të rregullt në shtetin helen.
