Qeveria miratoi të mërkurën një vendim, përmes së cilit rakordohet shuma e dëmshpërblimit për përmbytjet e banorëve të Shkodrës me detyrimet e faturave të energjisë elektrike.
Ministri i Energjisë dhe Industrisë, Damian Gjiknuri deklaroi të mërkurën nga selia e Kryeministrisë, se qeveria e mbajti zotimin e dhënë për dëmshpërblimin e këtyre banorëve, të cilët u dëmtuan nga qeverisja e shkuar.
“Ecuria pozitive e reformës në sektorin energjitik, rivendosja e ligjshmërisë në konsumin e energjisë elektrike na kanë krijuar mundësinë që t’i japim zgjidhje problemit të dëmshpërblimit të lënë zvarrë në shumë vite nga qeveria e djeshme”, deklaroi kreu i MEI-t.
Sipas Gjiknurit, është bërë një bilanc i detyrimeve që shteti ka mbetur pa u dhënë banorëve të përmbytur dhe detyrimeve që ata i kanë shtetit në formën e faturave të papaguara të energjisë elektrike. OSHEE, tha ai, ka kryer një rakordim mes emrave të listës së emergjencës civile për banorët e prekur nga përmbytja dhe detyrimit që këta banorë kanë të papaguara për energjinë elektrike të konsumuar.
“Nga ky rakordim ka rezultuar se janë 2868 kontrata për të cilat do të kryhet procedura e kompensimit me borxhin e akumuluar të energjisë elektrike dhe vlera totale që shkon deri tani është 222 milion e 416 mijë lekë”, deklaroi Gjiknuri.
Duke folur për vendimin e sotëm, ministri Gjiknuri theksoi se nëse shteti ka një borxh ndaj një banori dhe ky i fundit ka detyrime të papaguara të energjisë elektrike do të bëhet shuarja nëpërmjet aplikimit të realizuar në zyrat e OSHEE-së. Në rast se detyrimi ndaj OSHEE-së, vijoi ai, është më i madh, diferencën do ta zgjidhin sipas parashikimeve në marrëveshje.
“Banorët e prekur nga përmbytja, që sipas këtij vendimi janë në cilësinë e kreditorit, kanë dhënë pëlqimin për këtë shuarje nëpërmjet aplikimit të realizuar në zyrat e OSHEE-së, gjatë procesit të rakordimit të të dhënave”, tha kreu i MEI-t.
Kreu i MEI-t theksoi se qeveria ka marrë të gjitha masat përmes mirëmenaxhimit të kaskadës së Drinit që këta banorë të mos preken nga përmbytjet. “Pavarësisht reshjeve të dendura, për shkak të mirëmenaxhimit të sektorit energjitik dhe në veçanti kaskadës së Drinit, janë shmangur fenomenet e përmbytjeve në zonat e Shkodrës dhe Lezhës. Ju japim garanci banorëve që ky mirëmenaxhim do të vazhdojë edhe në të ardhmen. Kjo është një garanci shtesë për sezonet që do të vijnë, që këto përmbytje të shmangen”, deklaroi Gjiknuri./ATA/
