Ferat Shala, ministri i Mjedisit dhe Planifikimit Hapësinor në mbledhjen e Qeverisë, kërkoi forcë të përbashkët që të merren masat për parandalimin e ndotësve të ajrit.
Siç theksoi ai, janë evidentuar ndotësit kryesorë të ajrit, andaj ka kërkuar nga të gjithë dikasteret që të zbatojnë procesin e legjislacionit sa i përket kësaj çështjeje, raporton Lajmi.net.
“Po ashtu kërkojmë nga dikasteret që të bëjnë inspektime sepse vetëm ne nuk mundemi dhe të ndalohet ndotja. Po ashtu kërkojmë një plan në rishikimin e politikave të legjislacionit në vendin tonë.
Duhet vepruar sa më parë dhe kërkojmë krijimin e eko fondit për këto probleme”, tha ai, duke shtuar që një pjesë e fondit të ndërmarrjeve të privatizimit të ndahet për mjedis.
Ndërsa, zv.kryeministri Hajredin Kuçi ka kërkuar që të hartohet një plan i veprimit afatshkurtër të mesëm dhe të gjatë.
Kuçi ka thënë se pastaj duhet shikuar mundësitë ligjore të veprimit ose nevojën për ndryshim të ligjit dhe të dihen përgjegjësit, përgatiti Koha. (b.an)
