Kryeministri Edi Rama duket më se i vendosur për t’i shkuar deri në fund këtij mandati, ku mazhoranca aktuale ka mbi 85 vota në Kuvend. Pavarësisht protestës së opozitës te çadra apo më gjërë nëpër rrjetet sociale, kreu i qeverisë është shprehur se ka marrë një mandat për të qeverisur vendin dhe jo për t’i hapur rrugë sipas tij, gjithkujt që kap një mikrofon dhe kërkon largim nga qeveria të një mazhorance.
“Ore shoku Edvin, pse nuk e pranon qeverin teknike ti?”. Pyetjes në profilin zyrtar të kryeministrit në Facebook i është përgjigjur vetë kreu i qeverisë. Sipas kryeministrit qeveritë kanë parime dhe nuk ndjekin çdo propozim të çmendur që propozohet.
Një qytetar i indinjuar i ka shkruajtur: “Ore shoku Edvin, pse nuk e pranon qeverin teknike ti Kur e ‘do ‘ kaq shumë Shqipërinë? Se njeri nga ju duhet të hapi rrugë. Se boll kemi vuajtur me ju. Bëj mirë sa e ke në dorë. Dhe mos harro se të gjithë nga 2 metër vend do marim!
Edi Rama: Sepse zoti Piro, qeveria nuk është çështje personale dhe nuk vepron me parimin, “Hapi rruge budallait!”
Përgjigja vjen në kohën kur kreu i opozitës insiston për krijimin e qeverisë teknike që sipas tij, do i hapë rrugë zgjedhjeve të lira e të ndershme. Opozita prej 19 ditësh po proteston në çadrën para kryeministrisë duke bojkotuar Kuvendin, zhvillime që sollën dhe dështimin e ngritjes së komisioneve të Vettingut. /ma.me
