Qershor ‘19/E megjithatë, zgjedhjet do të bëhen!

Nga Altin Ketro

Shpresa e fundit për mbijetesë e opozitës jashtë parlamentare, mbetet shkatërrimi i procesit zgjedhor të datës 30 qershor. Në këtë datë kushtetuese të caktuar për t’i dhënë sovranit popull mundësinë që të vendosë për qeverisësit vendorë të tij, kjo opozitë e çartur ka deklaruar se do shkaktojë rrëmuja të cilat, sipas pas, do pamundësojnë shqiptarët t’u drejtohen kutive të votimit për të ushtruar vullnetin e tyre të lirë.

Këta parashikues ogurzi të gjëmave që na presin, e dinë edhe vetë që me këto lloj përbetimesh nuk motivojnë dot as familjarët e tyre, e jo më të gjejnë aq të marrë sa të bëhen mish për top për ambicien e sëmurë kryeministrore të Lulzim Bashës. Kur them “aq të marrë” kam parasysh një numër të atillë që do t’i bëjë ballë lumit të votuesve, e jo atij grushti militantësh që e kanë ndarë mendjen të marrin rol “kamikazi” politik më 30 qershor.

Gjithsesi, nisur nga proklamata e opozitës, m’u desh të hyja në imagjinatë dhe të udhëtoja para në kohë për të parë se ç’do të më ndodhë ditën e votimit. Atë ditë, unë, ashtu si qindra mijë të tjerë, do të shkojmë të kryejmë detyrën sublime të ushtrimit të vullnetit për të votuar. Imagjinata ma thotë se, diku përpara qendrës së votimit, do më dalin nja 2-3 persona dhe do të më kërkojnë të kthehem mbrapsht.

Le të supozoj se nuk do të ketë fare shërbim policor që do ofroj mbrojtje për mua (dhe të tjerë si unë). Nëse unë nuk iu bindem atyre personave, duke vijuar rrugën për tek qendra e votimit, çfarë do të më bëjnë ata? Pyetjet i kam për Lulin e për Monën meqë këta horra i bie që të jenë rekrutuar prej kësaj dyshe:

Do të më qëllojnë për të më vrarë?

Do të më qëllojnë për të më plagosur?

Do të më godasin për të më lënduar fizikisht?

Do të më kërcënojnë për pasoja të mëvonshme?

Ja më qëlloi mua fati i keq të pësoj ndonjërën prej pyetjeve më lart. Ja kështu si unë mund ta pësojnë edhe ca të tjerë. Po mirë, kaq gangstera do jenë këta tuajt që me këto forma kriminale do veprojnë me të paktën 800 mijë shqiptarë?! Apo shpresoni se po e pësuan disa syresh, armata e së paku 800 mijë shqiptarëve do frikësohen e do ndrydhen në shtëpi?!

O të mjerët ju politikanë dritëshkurtër që thurrni dhe ëndërroni skenarë të tillë primitivë. Po si ua nxë edhe goja dhe e thoni publikisht pa ju skuqur faqja, o të paturp faqezinj. Unë, tjetri e tjetri, nuk shkojmë të votojmë se na e kërkon qeveria, por se e kemi në ndërgjegje qytetare e civile për ta ushtruar këtë të drejtë kushtetuese.

Ne e respektojmë në maksimum të drejtën tuaj për të mos marrë pjesë në zgjedhje. Ne as po u kërkojmë më dhunë që ju të votoni, e as po përkrahim përdorimin e forcës që ju ta bëni diçka të tillë. Atëherë, çfarë dreqin keni që nuk tregoheni të arsyeshëm dhe të na lini në paqe ne të tjerëve për të vepruar sipas ndërgjegjes sonë?!

E keni ndarë mendjen që ta pengoni popullin? Epo, çfarëdolloj skenari halucinant të keni sajuar ju djallëzorë, një gjë është e sigurt si drita e diellit dhe këtë nguliteni fort në mendje, Lulzim e Monika. Më 30 qershor, në Shqipëri, do të zhvillohen zgjedhje vendore, doni apo s’doni ju! Dhe ju do humbni thellë, merrni apo nuk merrni pjesë në to!