Sikurse ishin parashikimet, ka ndodhur. Në këto ditë të para janari të vitit 2016, në stadiumin “Qemal Stafa” janë shfaqur dy makineri shpuese, që si sonda po bëjnë shpime në materialin gjeologjik të tokës, ku është ngritur prej vitesh të tëra ndërkombëtari ynë. Të parët që e kanë bërë “sefte” aty ku do të ngrihet “Arena Kombëtare” kanë qenë specialistët gjeologë, të cilët kanë nisur të studiojnë natyrën e tokës.
Në bazë të rezultateve që do të dalin nga gërmimet deri në 50 metra thellësi, nga 6 shpime në pozicione të ndryshme, do të procedohet më tej nga inxhinierët përkatës. Kampionët e këtyre shpimeve do të analizohen në laboratorë specifikë dhe do të vihen në dispozicion të ixnhinierëve projektues dhe atyre zbatues të stadiumit të ri të kombëtares. Janë hapat e parë, por me rëndësi është fakti se ka nisur puna.
Në fakt, ka qenë anëtari i Komitetit Ekzekutiv të Federatës Shqiptare të Futbollit, që merret me investimet, Arben Dervishi, ai që ka njoftuar hapjen e një kantieri tjetër ndërtimi në impiantet sportive qysh në nëntor të vitit të shkuar. Fjala ishte për stadiumin “Qemal Stafa”, që, sipas tij, do të shembet në janar 2016 dhe aty do të nisin punimet për ndërtimin e stadiumit të ri, i cili do të ndryshojë edhe emër. Këtë gjë e njoftoi edhe Kryeministri Edi Rama, kur priti kombëtaren pas kthimit nga Armenia, duke thënë se stadiumi i ri do të quhet “Arena Kombëtare”.
Arben Dervishi konfirmoi se projekti nuk ndryshon, është ai që ka hartuar prej kohësh FSHF-ja. “Stadiumi do të ndërtohet me konçension. Ende nuk e kemi gjetur konçensionarin, por së shpejti besoj se edhe kjo procedurë do të mbyllet, – nënvizoi mes të tjerash Dervishi. – Pas pak muajsh, ose më saktë në janar të vitit të ri, do të nisë të shembet stadiumi aktual “Qemal Stafa”, mbi rrënojat e të cilit do të ngrihet stadiumi i ri, që do të quhet “Arena Kombëtare”. E përsëris, nuk do të ketë asnjë ndryshim nga projekti italian, që kemi paraqitur publikisht. Projekti në fjalë parashikon një kapacitet prej 22.000 vendesh dhe me të gjitha tribunat e mbuluara. Godina do të përmbajë rreth 14.000 metra katrorë qendër biznesi dhe shërbime të tjera, ndërsa 4000 metra katrorë do të jenë një sipërfaqe në dispozicion të Federatës Shqiptare të Futbollit për zyra dhe nevojat e saj. Ajo që bie në sy, në anën veriore të stadiumit është një kullë e lartë, ku pjesa e sipërme do të shërbejë si restorant ekskluziv i stadiumit dhe një studio televizive trasmetimi. Shembja mund të zgjasë për afro 6 muaj dhe me nisjen e finaleve të Europianit të Francës mund të nisë edhe ndërtimi i stadiumit të ri. Përsa i përket financimit, ende nuk është vendosur përfundimisht se si do të jetë skema, por FSHF-ja dhe qeveria do të japin pjesën më të madhe të shumës”.
Gjatë pritjes zyrtare që organizoi për kombëtaren kuqezi, pas kthimit nga Armenia, ku vulosi edhe kualifikimin historik në finalet e “Euro 2016”, Kryeministri Edi Rama deklaroi si dhuratë një stadium modern, që do të quhet “Arena Kombëtare”, ndërsa në hyrje të tij do të vendoset në një pllakatë, në të cilën do të shkruhen të gjithë emrat e lojtarëve, që e bënë ëndrrën e shqiptarëve realitet. Edhe në bilancin e punës së ekzekutivit shqiptar, Rama njoftoi se viti 2016 do të jetë koha kur do të hedhë shtat “shtëpia kuqezi”, në vendin ku sot kanë nisur gërmimet, në “Qemal Stafa”.
Telesport
