Presidenti rus Vladimir Putin, i cili ishte ‘zhdukur’ nga opinioni publik që kur forcat e tij u tërhoqën nga Kievi këtë muaj, u rishfaq ditën e sotme për të mbrojtur pushtimin e tij “fisnik” të Ukrainës.
Në një konferencë shtypi brenda një baze hapësinore të largët lindore, gjashtë zona kohore nga Moska, Putin theksoi se sipas tij, Moska nuk kishte “zgjidhje tjetër” veçse të ndërhynte për të mbrojtur separatistët, për të mposhtur neo-nazistët dhe “të ndihmonte njerëzit” në Ukrainë.
Ekonomia e Rusisë po qëndronte në këmbë pavarësisht sanksioneve perëndimore, shtoi ai, dhe shenjat e krimeve të luftës që supozohej se ishin kryer nga trupat ruse ishin falsifikime të organizuara nga Perëndimi.
Sa i përket bisedimeve: “Ne jemi kthyer sërish në një situatë qorre për ne”- tha ai.
Ishte vetëm paraqitja e tij e dytë publike brenda një jave, pas një paraqitje të shkurtër në funeralin e një ligjvënësi nacionalist ku ai nuk tha asgjë drejtpërdrejt për luftën.
I pyetur nga punëtorët në bazën hapësinore nëse operacioni në Ukrainë do t’i arrinte qëllimet e tij, Putin tha: “Absolutisht. Unë nuk kam fare dyshim. Qëllimet e saj janë absolutisht të qarta dhe fisnike”.
Tanket ruse u tërhoqën nga veriu i Ukrainës pasi dështuan në atë që Perëndimi beson se ishte një mision për të kapur me shpejtësi kryeqytetin Kiev. Shumë nga qytetet që lanë pas ishin të mbushura me trupa civilësh të vrarë në atë që Kievi thotë se ishte një fushatë vrasjesh, torturash dhe përdhunimesh.
Moska mohon të ketë në shënjestër civilët ose të ketë kryer krime lufte.
Rusia thotë se fushata e saj tani synon të kapë më shumë territor në emër të separatistëve në dy provincat lindore, në Donbas. Ai përfshin portin e Mariupolit, i cili është kthyer në një qytet “fantazmë” nën rrethimin rus.
/b.h
