Gëzim Olaj është një sipërmarrës i cili pas 26 vitesh është kthyer nga Londra në Shqipëri. Në kryeqytetin britanik ai kishte ngritur një agjenci udhëtimesh por gjatë gjithë kohës mendonte për Shqipërinë.
3 vite më parë, Olaj vendosi të kthehej në vendlindje, në Bogë dhe të ngrinte një resort i cili ka rezultuar mjaft i suksesshëm. Ai shpjegon në “Shije Shtëpie” në Tv Klan se marrja e një vendimi të tillë lidhej fort me dashurinë ndaj vendlindjes.
Gëzim Olaj: Në këto vendime të fillosh të bësh kalkulime nuk ka shanse të kthehesh në Shqipëri se të dalin të gjitha kundër. Të fillosh të bësh detyrat e shtëpisë, nuk kthehesh. Këto vendime kanë një ndjenjë nacionalizmi, një ndjenjë atdhedashurie për vendin tënd, sidomos për vendin ku ke lindur dhe t’i shërbesh me këto mënyra, pra i thonë në anglisht “a crazy way”.
Katerina Trungu: Mënyrë e çmendur.
Gëzim Olaj: Unë kam qenë i çmendur përderisa kam ardhur, por në çdo moment deri më sot nuk jam bërë pishman, jam shumë i lumtur për çfarë kam bërë. Sadisfaksionin e dëgjoj te njerëzit kur vijnë atje dhe kur kënaqen më japin një sadisfaksion të paparë. Vështirë është jashtëzakonisht shumë nga ana emocionale dhe nga ana logjistike. Vitet e para se gjithë rryma e njerëzve do të shkojë në Londër, unë kam qenë ndër të vetmit që është kthyer nga Londra këtu. Atëherë, vjen këtu, nuk has ndonjë frymë shumë të mirë, burokracira, korrupsion, do të zhvillosh diçka nga të gjitha anët, shkon në zyrat e shtetit, në banka, gjëra, institucione, njerëzit mendojnë “i shkreti, është kthyer nga Londra” se unë quhem si viktimë këtu. Unë i kam kaluar të gjitha këto.
Aktualisht, një pjesë e familjes jeton ende në Londër dhe si rrjedhojë, kjo vështirëson disi anën emocionale. Megjithatë, sipërmarrësi shton se kthimi dhe biznesi në vendlindje janë realizimi i ëndrrës së tij.
Gëzim Olaj: Që ditën e parë që kam shkelur në Angli në ’95, ka qenë ëndrra ime të kthehem.
/a.r
