Policia e Tiranës ka bërë të mundur sekuestrimin e një automjeti luksoz tip “Lamborghini Urus”, me vlerë 160 mijë euro. Ky sekuestrim ka ardhur në kuadër të operacionit të koduar “Manovra”, që synon identifikimin dhe sekuestrimin e pasurive me burim kriminal.
Mjeti është ndaluar gjatë një kontrolli në aksin rrugor “Sauk–TEG” dhe drejtohej nga Sahit Shpataj, 34 vjeç, person me precedent penal për disa vepra, përfshirë vjedhje nëpërmjet përvetësimit të padrejtë të detyrës shtetërore, dhunë në familje dhe kundërshtim ndaj punonjësve të policisë.
Nga verifikimet e kryera, rezulton se automjeti ishte regjistruar në emër të një subjekti tregtar në pronësi të shtetasit E. D., me qëllim shmangien e gjurmimit dhe justifikimin e vlerës së mjetit. Si pasojë, ndaj të dyve është nisur procedim penal dhe hetimet vijojnë për identifikimin e pasurive të tjera të dyshuara të përfituara në mënyrë të paligjshme.
Materialet i janë referuar Prokurorisë së Tiranës për veprime të mëtejshme ligjore.
Njoftimi i plotë i Policisë:
Tiranë/Finalizohet operacioni policor i koduar “Manovra”, me objektiv gjurmimin e aseteve të përfituara nga krimet.
Sekuestrohet automjeti “Lamborghini Urus” i një 34-vjeçari me precedent për disa vepra penale, ndër to, vjedhje nëpërmjet përvetësimit të padrejtë të detyrës shtetërore.
34-vjeçari dyshohet se e kishte regjistruar automjetin me vlerë rreth 160 000 euro, në emër të një kompanie, për të shmangur gjurmimin dhe për të justifikuar vlerën.
Vihen në hetim 34-vjeçari dhe pronari i kompanisë.
Në vijim të operacioneve policore që kanë qëllim gjurmimin dhe sekuestrimin e pasurive me burime kriminale, specialistët e Seksionit për Hetimin e Pastrimit të Parave dhe Aseteve, në bashkëpunim me shërbimet e Forcës së Posaçme “Shqiponja”, finalizuan operacionin “Manovra”.
Në kuadër të operacionit, u ndalua në aksin rrugor “Sauk-TEG”, automjeti tip “Lamborghini Urus”, me drejtues shtetasin S. Sh., 34 vjeç, me precedentë për vjedhje nëpërmjet përvetësimit të padrejtë të detyrës shtetërore, dhunë në familje dhe kundërshtim të punonjësve të Policisë.
Nga verifikimet e mëtejshme dyshohet se ky shtetas e kishte regjistruar këtë automjet, në emër të një subjekti tregtar në pronësi të shtetasit E. D., me qëllim justifikimin e vlerës së tij.
Në vijim të veprimeve procedurale nisi procedimi penal për të 2 këta shtetas.
Vijojnë hetime për të gjurmuar dhe sekuestruar pasuri të tjera të shtetasit S. Sh.
Materialet procedurale iu referuan Prokurorisë së Tiranës, për veprime të mëtejshme.
