Nga Roland Qafoku
Kjo është një hartë e sapo publikuar nga World GeoDemo por që në fakt i referohet një studimi të Bankës Botërore të vitit 2016. Paraqet kontinentin tonë me përqindjen e sipërfaqeve të pyjeve që zë territori i secilit shtet. Për Shqipërinë harta tregon se pyjet zënë 28.1 për qind të territorit. Jemi në vend të parafundit në Ballkan duke lënë pas Turqinë që e penalizon pjesa lindore që ka sipërfaqe të tëra djerr. Hahemi pak me Greqinë dhe Serbinë dhe jemi ku e ku me Slloveninë. Pyjet atje zënë 62 për qind të territorit dhe këtë shifër ne e shikomë me teleskop.
Çdokush që vështron këtë hartë duhet të shpërthejë nga marazi. Shikoni se çfarë i kemi bërë tokës sonë. E kemi shkatërruar me themeli. Drurët, pishat, ahet, arrat, lisat, ej. nuk na i ka prerë as osmani, as dushmani, as italiani e as gjermani. I kemi prerë vetë dhe u kemi vënë edhe zjarrin. Janë dy dëshmi unikale të para 100 vjetësh e tutje se shqiptarët i kanë shkatërruar pyjet tamam si ushtrimi i një sporti. Faik Konica shkruante në “Shqipëria si mu duk” se pyllin më të bukur që kishte Shqipëria në të cilin këndonin me mijëra zogj, diku pranë Shijakut, në një nga kthimet e tij në vitet 20-të, befas pa se ishte zhdukur. Në pak kohë i kishin prerë të gjitha pemët.
Dëshmia më e hershme është e Ismail Qemalit që në kujtimet e tij shkruan se në 1850 ishte pronar i pyllit të Karaburunit. Sot Gadishulli nuk ka asnjë pemë dhe sipërfaqja duket gati hënore. Për të mos vijuar pas viti 1990 që “populli im trim dhe patriot” sharroi pyje të tëra për dru zjarri dhe u vuri flakën sa e sa sipërfaqeve “për kullotë”. Për të mos vijuar akoma me qeveritë e këtyre 34 viteve që ndonëse kanë mbjellë pemë, nuk kanë krijuar asnjë pyll të ri. Pyjet tregojnë se çfarë kanë mbjellë brezat paraardhës për ne. Kjo hartë tregon se çfarë po bëjmë ne brezi ynë për pasardhësit tanë.
