Dy petroliere, përfshirë “Anatoly Kolodkin”, që është në listën e sanksioneve perëndimore, po drejtohen drejt Kubës me mbi 700,000 fuçi naftë.
Sipas platformës së gjurmimit detar Kpler, nafta u ngarkua më 8 mars në portin rus të Primorsk-ut, në Detin Baltik, dhe aktualisht ndodhet në Atlantikun lindor, me destinacion terminalin e Matanza-s, ku pritet të mbërrijë rreth 23 marsit.
Një tjetër anije, “Sea Horse”, me flamur të Hong Kong-ut, ka ngarkuar rreth 200,000 fuçi naftë në janar pranë Qipros dhe ka lëvizur drejt Atlantikut Perëndimor që nga 13 shkurti. Aktualisht ndodhet në Detin Karaibe, rreth 1,500 km larg bregut kuban.
Kjo situatë pas vendosjes së një bllokade energjetike nga Shtetet e Bashkuara nën drejtimin e Donald Trump, pas arrestimit së udhëheqësit venezuelian Nicolás Maduro, duke ndërprerë furnizimet me naftë nga Venezuela dhe Meksika. Kuba nuk ka marrë naftë që nga 9 janari.
Ndërkohë, vendi po përballet me krizë energjetike të rëndë: qytetarët kanë përjetuar 6 bllokime të mëdha të energjisë në 18 muaj, me ndërprerje deri në 48 orë në disa provinca.
Shumë centrale elektrike janë të vjetruara që nga vitet ’60-’70 dhe mungesa e investimeve ka shkaktuar defekte të shpeshta. Rreth 40% e energjisë vjen nga gjeneratorë që përdorin naftë, e cila mungon, që nga bllokada e janarit.
Ekspertët vlerësojnë se nevojiten 8–10 miliardë dollarë për të rindërtuar sistemin elektrik, një nivel që Kuba nuk e ka. Kriza energjetike po rëndon ekonominë, e cila ka rënë mbi 15% që nga 2020-a, dhe po nxit protesta qytetare. Javët e fundit ka pasur demonstrata në Havanë dhe Moron, ku u arrestuan disa persona.
Furnizimi i mundshëm me naftë nga Rusia mund të lehtësojë situatën, por nuk do të zgjidhë menjëherë problemet, pasi nafta duhet të përpunohet dhe infrastruktura elektrike mbetet e dobët.
