Rusia dhe SHBA-ja mund të arrijnë së afërmi një marrëveshje për një bashkëpunim për Sirinë, u shpreh sot presidenti rus, Vladimir Putin.
“Ne po avancojmë pak nga pak në drejtimin e mbarë duke mos përjashtuar mundësinë e rënies dakort mjaft shpejt për disa çështje që do t’i njoftohen komunitetit ndërkombëtar”, deklaroi Putin i pyetur nga Bloomberg, sipas deklaratave të publikuara nga Kremlini në nisje të Forumit Ekonomik të Lindjes në Vladivostok (Lindja e Largme ruse).
“Është ende mjaft herët për të biseduar për këtë temë, por besoj se do të shënojmë progrese në drejtimin e dëshiruar”, shtoi presidenti rus, duke vlerësuar “durimin” dhe “këmbënguljen” e sekretarit amerikan të Shtetit, John Kerry.
Ekspertë ushtarakë dhe diplomatë të Rusisë dhe të Shteteve të Bashkuara të Amerikës po vijojnë bisedimet në Gjenevë rreth mundësisë së arritjes së një armëpushimi më gjithpërfshirës dhe mjaft të rëndësishëm në Siri./a.m.
