Koreja e Veriut mund të zgjerojë ndjeshëm mbështetjen ushtarake ndaj Rusisë, me deri në 50 mijë trupa të tjera që mund të dërgohen në vend, ndërsa vala e re e forcave koreano-veriore përfshin edhe qindra operatorë dronësh që mund të përdoren kundër objektivave në Ukrainë.
Sipas gjeneralmajorit Vadym Skibitskiy, zëvendësdrejtor i Inteligjencës së Mbrojtjes së Ukrainës, rreth 8,500 ushtarë koreano-veriorë ndodhen aktualisht në Rusi. Mes tyre janë rreth 1,000 inxhinierë dhe specialistë të çminimit, si dhe rreth 400 operatorë dronësh.
Sipas tij, këta operatorë kanë fituar përvojë nga dislokimet e mëparshme dhe dronët mund të përdoren si për zbulim, ashtu edhe për sulme ndaj objektivave brenda Ukrainës.
Skibitskiy thotë se presidenti rus Vladimir Putin mund t’i kërkojë liderit koreano-verior Kim Jong Un deri në 50 mijë trupa shtesë gjatë takimit të tyre të pritshëm në shtator.
Trupat e Koresë së Veriut nuk pritet të angazhohen drejtpërdrejt në territorin ukrainas. Sipas inteligjencës ukrainase, ato do të përforcojnë pozicionet e pasme ruse, duke liruar ushtarët rusë për operacionet sulmuese në Ukrainë.
Pretendimet ukrainase janë mohuar nga Kim Yo Jong, motra e fuqishme e liderit koreano-verior, e cila i ka cilësuar raportimet për dërgimin e dhjetëra mijëra trupave të reja si një “skenar të pabazuar dhe të sajuar”.
Sipas inteligjencës ukrainase, rreth 25 mijë ushtarë koreano-veriorë janë dislokuar ose kanë kaluar me rotacion në Rusi deri tani.
Dislokimi i parë nisi në rajonin e Kurskut në tetor 2024, në përpjekje për të zmbrapsur inkursionin ukrainas. Koreja e Veriut e konfirmoi vetëm në prill 2025 se ushtarët e saj kishin marrë pjesë në luftime përkrah forcave ruse.
Vlerësimet ukrainase thonë se rreth 10 mijë ushtarë koreano-veriorë morën pjesë në fazën e parë të operacioneve dhe pësuan humbje të konsiderueshme. Përveç trupave dhe dronëve, Pheniani dyshohet se ka furnizuar Moskën edhe me raketa balistike KN-23 dhe KN-24.
Skibitskiy pretendon se, përpara gushtit të vitit të kaluar, Koreja e Veriut kishte dërguar të paktën 150 raketa, ndërsa 120 të tjera ishin premtuar. Rreth 40 prej tyre, sipas tij, janë dorëzuar.
Ai tha gjithashtu se rreth 90 specialistë koreano-veriorë janë dërguar në Voronezh për të asistuar në lëshimin e raketave.
Në këmbim të trupave dhe municioneve, Pheniani kërkon nga Moska sistemin rus të mbrojtjes ajrore S-400. Sipas inteligjencës ukrainase, Koreja e Veriut ka marrë tashmë një sistem raketor Pantsir-1.
Zhvillimet e fundit tregojnë për një thellim të bashkëpunimit ushtarak mes Moskës dhe Phenianit, në një kohë kur Ukraina po përballet me mungesa të konsiderueshme të sistemeve të mbrojtjes ajrore dhe raketave interceptuese.
