Rusia do të prezantojë raketën e saj të re bërthamore strategjike Sarmat në fund të këtij viti, tha Presidenti Vladimir Putin, duke e përshkruar atë si “më të fuqishmen në botë”.
Vendosja e planifikuar e raketës – e projektuar për të transportuar koka bërthamore për të goditur objektiva mijëra milje larg në Shtetet e Bashkuara ose Evropë – vjen pas viteve të tëra pengesash dhe vonesash.
Putin shtoi se fuqia e kokës bërthamore ishte më shumë se katër herë më e madhe se çdo ekuivalent perëndimor dhe rrezja e saj e veprimit tejkalonte 35,000 km (21,750 milje).
“Ka aftësinë të depërtojë në të gjitha sistemet ekzistuese dhe të ardhshme të mbrojtjes kundër raketave”, tha ai.
Analistët perëndimorë të sigurisë thonë se Putini ka bërë pretendime të ekzagjeruara për aftësitë e disa prej armëve bërthamore të gjeneratës së re të Rusisë, pjesë e një programi modernizimi që ai e njoftoi për herë të parë në vitin 2018.
Sarmat ka parë dështime në të kaluarën – një provë në shtator 2024 la një krater të thellë në silonë e lëshimit, sipas ekspertëve perëndimorë.
“Vendosja e lançuesve të pajisur me sistemin e raketave Sarmat do të rrisë ndjeshëm aftësitë luftarake të forcave bërthamore strategjike tokësore në drejtim të garantimit të shkatërrimit të objektivave dhe zgjidhjes së problemeve të parandalimit strategjik”, tha Karakayev, komandant i forcave raketore strategjike të Rusisë.
Që nga fillimi i luftës në Ukrainë në vitin 2022, Putini i ka kujtuar vazhdimisht botës madhësinë dhe fuqinë e arsenalit bërthamor të Rusisë në deklarata të cilat Perëndimi i ka parë si përpjekje për ta penguar atë të ndërhyjë shumë fuqishëm në anën e Ukrainës./ Reuters
